د اروپایی ټولنې د یوې څیړنې پایلې ښیي، چې په اېکس خواله رسنۍ کې د درواغو کچه د نورو رسنیو پرتله زیاته ده. دغه څېړنه په خواله رسنیو کې له ناسمې محتوا سره د مقابلې په برخه کې د اروپایی ټولنې د لارښوونې په توګه ترسره شوې.
په دې څېړنه کې په شپږو بېلابېلو خواله رسنیو کې له څلور زره او ۴۶۰ کاروونکو حسابونو څخه له شپږ زرو څخه ډېر ځانګړي پوسټونه کتل شوي دي.
په دې څېړنه کې په درېیو هېوادونو اسپانیا، پولنډ او سلواکیا کې د فیسبوک، انسټاګرام، لېنکډین، ټیک ټاک، اېکس او یوټیوب پلیټ فارمونو منځپانګه څېړل شوې ده.
د دې څېړنې د پایلو په اړه یو ۷۲ مخییز خپور شوی راپور ښیي، چې د اېکس رسنۍ شاوخوا ۴۳ سلنه بیاکتل شوي پوسټونه داسې کلمې لري، چې څېړونکو د ناسمې منځپانګې یا درواغو په توګه ډلبندي کړي.
په اېکس خواله رسنۍ کې د درواغو د خپرېدو دغه کچه د نورو رسنیو پرتله خورا لوړه ده.
په دې بیاکتنه کې، یوټیوب تر ټولو کمه ناسمه منځپانګه لري.
راپور په خواله رسنیو غږ کړی، چې د غلطو منځپانګو سره د مبارزې لپاره ډېر څه وکړي.
سربېره پر دې، د روڼتیا لپاره د اروپایی کمیسیون مرستیال ورا جوروا خبرداری ورکړ، چې اېکس خواله رسنۍ باید د "ډیجیټل خدمتونو قانون" سره سم د اروپایی ټولنې لهخوا ټاکل شوي چوکاټ سره مطابقت ولري.
په ۲۰۱۸ کال کې د اېکس خواله رسنۍ چې د ټویټر په نوم یادېده، د ډېرو نورو خواله رسنیو سره په داوطلبانه توګه هوکړه وکړه، چې د غلطو مالوماتو په اړه د اروپايي ټولنې لارښوونې به پلې کړي؛ خو په تېره مې میاشت کې وروسته له دې چې ټویټر د اېلان ماسک لهخوا وپېرل شو، هغه پرېکړه وکړه چې له دې هوکړې ووځي.
که څه هم اېکس د اروپایی ټولنې لهخوا خپور شوی راپور چې د "ټرسټ لب" شرکت لهخوا چمتو شوی و د خوښې پایلې نه دي ترلاسه کړي؛ خو د دغه راپور لیکوالانو ټینګار کړی، چې ترلاسه شوي شمېرې ښایي د اروپایي ټولنې نورو هېوادونو سره برابرې نه وي.
د دغې خواله رسنۍ مدیرانو تر اوسه د خپاره شوي راپور په اړه غبرګون نه دی ښودلی.
د ډیجیټل خدمتونو قانون له لارې، اروپایی ټولنه غواړي، چې په داوطلبانه توګه د ناسمې منځپانګې پر وړاندې د مبارزې په برخه کې اجرایي چوکاټونو ته واړوي.
د دغو مقرراتو څخه د سرغړونې پر مهال، ټولنیز پلیټ فارمونه د ملیاردونو یورو جریمې سره مخامخېږي، لکه د نړۍوالې تبادلې تر شپږ سلنې پورې تادیه کېږي.
د دغه قانون د تصویب په غبرګون کې اېلان ماسک ویلي و، چې د هغه شرکت به له دغه قانون څخه پیروي وکړي.
