د افغانستان لپاره د ایران استازي د مسکو په غونډه کې له قومي، جنسیتي او کلتوري او ژبني توپیر پرته د عادلانه حکومتدارۍ او د اتباعو د حقونو د تامین غوښتنه وکړه.
حسن کاظمي قمي وویل چې د طالبان له خوا په "مشروع او ټول منونکي نظام" جوړېدو سره د پرمختګ ضمانت کېږي.
د افغانستان لپاره د ایران د اسلامي جمهوریت استازي وویل، طالبانو سره یې په تېرو دوو کلونو کې د اساسي قانون د مسودې د تصویب او وړاندې کولو، له جنسیتي تبعیض پرته د زدکړو د حق، د ټولو د رول په منلو سره د سیاسي مشروعیت د ترلاسه کولو لپاره د ټولو قومونو منل او د ګاونډیو امنیت تامینولو په اړه خبرې کړې دي.
د کاظمي قمي په وینا، "د اسلامي جمهوریت له نظره، په دې برخو کې ځواب ورکول ضروري بولي."
د ایران د اسلامي جمهوریت استازي د جمعې په ورځ (د میزان ۷ مه) د مسکو په غونډه کې وویل چې د افغانستان اقتصادي او صنعتي پرمختګ په یوه خوندي او تضمین شوي چاپیریال کې د ګاونډیانو خواخوږۍ او همکارۍ ته اړتیا لري.
حسن کاظمي قمي همداراز له طالبانو وغوښتل چې په افغانستان کې د بېلابېلو ډلو هیلې پوره کړي.
نوموړي همدا راز له ایران څخه د افغان کډوالو د بېرته ستنېدو غوښتنه وکړه.
داسلامی جمهوریت استازی د مسکو په غونډه کښې په خپله وینا کښې یو ځل بیا د هلمند له سیند څخه د ایران د اوبو په برابرولو ټینګار وکړ .
ښاغلي کاظمي قمي وویل چې د اوبو د کمښت مسله د ایران او د هغه د ګاونډیانو له جدي ستونزو څخه ده او اسلامي جمهوریت د هلمند د تړون د عملي کېدو غوښتنه کوي.
د مسکو فرمټ غونډه د جمعې په ورځ د ( میزان ۷ مه ) د روسیې په کازان ښار کې جوړه شوه.
په دې غونډه کې د روسیې، هند، ایران، قزاقستان، قرغزستان، چین، پاکستان، تاجکستان، ترکمنستان او ازبکستان استازو ګډون کړی دی.
دې غونډې ته د سعودي عربستان، متحده عربي اماراتو، قطر او ترکیې استازي هم د څارونکو په توګه بلل شوي دي.
د طالبانو یو پلاوی چې مشري یې د دې ډلې د بهرنیو چارو د وزیر امیر خان متقي کوي، د مسکو په غونډه کې د مېلمنو په توګه ګډون کړی دی.
د سیمې د یو شمېر هېوادونو ځانګړو استازو د افغانستان په اړه د مسکو په غونډه کې له ترهګرۍ سره پر مبارزې او په افغانستان کې د یوه ټولګډونه حکومت پر جوړېدو ټینګار وکړ.