له څه باندې څلور زره کورنیو سره بشري مرستې وشوې
د افغانستان په لسو بېلابېلو ولایتونو کې له کابو څلور زره او ۱۳۴ بې ځایه شویو کورنیو سره بشري مرستې وشوې.
د طالبانو د کډوالو چارو وزارت د خبرپاڼې له مخې، په دغو مرستو کې خوراکي توکي، نغدې پيسې، کرنيزې کڅوړې، ژمنۍ جامې، روغتيايي درمل، د وړيو د سپينولو وسايل، د صابون د توليد وسايل او د شېدو وزې شاملې دي.
د یوه بل خبر له مخې، په ننګرهار ولایت کې نن سلو کورنیو ته د نغدو پیسو مرسته هم وشوه.
دغو کورنیو چې پخوا د هغه ولايت د کډوالو رياست د کارکوونکو لهخوا سروې او پېژندل شوې وې، د ناروې د کډوالو د ټولنې لهخوا هرې کورنۍ ته د ۲۷ زره افغانيو په شاوخوا کې مرسته ترلاسه کړه.
دغه مرستې په داسې حال کې کېږي چې د خوړو د نړۍوال پروګرام ترڅنګ ډېر شمېر مرستندویه بنسټونه د بودجې له جدي کمښت سره مخ دي.