د افغان نجونو، ښځو او بشري حقونو لپاره د امریکا ځانګړې استازې رینا امیري په خپلې اېکس پاڼه کاږلي، چې په تېره میاشت کې یې په بېلابېل ډول د افغان همکارانو او افغان مشرانو او فعالانو سره د افغانستان په اړه ناستې ترسره کړې دي.
هغې زیاته کړې:« په افغانستان کې د ویجاړوونکي وضعیت د ښه کولو لپاره تګلارې ښایي توپیر ولري؛ خو هغه څوک چې د بشري حقونو د ټینګښت په لټه کې دي باید د مدني خبرو اترو او زغم فضا منعکس کړي کومه چې دوی یې په افغانستان کې د رامنځته کېدو هیله لري.»
هغې لیکلي:« موږ باید په ټولیز ډول طالبانو ته دا روښانه کړو، تر هغه وخته به د اړیکو عادي کول ناشوني وي؛ څو چې دوی د افغانانو حقونو ته درناوی ونه کړي.»
هغه وایي، دوی او نړۍواله ټولنه باید په دې برخه کې ښه کار وکړي او افغانان په حقه دي چې ښځې او مدني ټولنې باید د افغانستان په اړه په بحثونو کې، په ځانګړې توګه کله چې طالبان په کې ښکېل وي، په معقوله توګه استازیتوب وکړي.
هغې د خپلې لیکنې په وروستۍ برخه کې ویلي:« موږ باید ډاډه شو، چې د افغانانو په ځانګړې توګه د ښځو په ملاتړ زموږ څرګندونې د طالبانو د سختو او ځپونکو اقدامونو سره د مقابلې لپاره د زدهکړو، کار او نورو وسیلو د لاسرسي په برخه کې د سرچینو سره د سمبالولو لپاره د قوي ملاتړ سره سمون لري.»
هغې د نړۍوالې زدهکړې لپاره د ملګرو ملتونو له استازي ګورډن براون سره په خپلې وروستۍ لیدنه کې ویلي:« تر هغې چې د افغانستان نیمایي وګړي له خپلو حقونو بې برخې دي، افغانستان نه شي کولی چې له بېوزلۍ او بې ثباتۍ ووځي.»