د طالبانو د بهرنیو چارو وزارت ویاند وايي، امیرخان متقي د مسکو غونډې په بهیر کې د افغانستان لپاره د چین او پاکستان له ځانګړو استازو سره ګډه ناسته کې د پاکستان استازي ته ویلي: «د ستونزو د راپورته کېدو پرمهال بايد د رسنيزو څرګندونو پرځای له ديپلوماتيکو لارو يې د اواري هڅه وشي.»
حافظ ضیا احمد خپل اېکس کې وايي، په دې ناسته کې د افغانستان، پاکستان او چين پر اړيکو، مشترکو ګټو او تهديدونو مفصلې خبرې وشوې.
طالبان د چینايي استازي له خولې وايي چې هېواد یې په سيمه کې د امنیت، ثبات او پرمختګ د ملاتړي په توګه چمتو دی چې افغانستان سره په ګڼو برخو کې خپلې مرستې لا زياتې کړي.
د پاکستان او چین استازو لا د دې ناستې په هکله څه نه دي ویلي.
خو د امیرخان متقي دا څرګندونې په داسې حال دي چې دې وروستیو کې پر طالبانو د اسلام اباد نیوکې ډېرې شوې دي.
که څه هم پاکستان د طالبانو ملاتړی بلل کېږي، خو په دغه هېواد کې د وسلوالو بریدونو په ډېرېدو پسې اسلام اباد پر افغان طالبانو تور لګوي چې په خپله خاوره کې یې پاکستاني طالبانو ته پنا ور کړې ده.
افغان طالبان دا تور ردوي او وايي، پاکستاني طالبان په هغه هېواد کې دومره سیمه تر کنټرول لاندې لري چې پکې فعالیت کوي.