په هند کې د افغانستان اسلامي جمهوريت لوی سفارت تېره شپه ناوخته په دغه هیواد کې د افغانستان د اسلامي جمهوریت د سفارت تړلو په تړاو اعلامیه خپره کيږي.
ويل کیږي دغه سفارت د کوربه هيواد د نه همکارۍ او بشري سرچینو د نشت له امله تړل شوی.
دغه اعلامیه چې په هند کې د افغانستان د اسلامي جمهوريت د سفارت له ادرسه خپره شوې پکې لیکل شوي چي په نوي ډیلي کې د (اکتوبر په لومړۍ ) نېټه د افغانستان اسلامي جموریت لوی سفارت د خپلو ورځینو کړنو د درولو پرېکړه کړې.
په هند کې د افغانستان اسلامي جمهوریت لوی سفارت په دغه هیواد کې د خپل ډیپلوماټیک استازولۍ د تړلو لاملونه هم ذکر کړي دي.
د سفارت په اعلامیه ویل شوي چې کوربه هیواد له لوري د ملاتړ نه شتون، د بشري ځواک کموالی، او د هند حکومت له لورې بیلابیل فشارونه د دې لامل شول چي په نوي ډیلي کې د افغانستان اسلامي جمهوریت سفارت چاري ودروي.
د افغانستان اسلامې جمهوریت سفارت په اعلامیه کې ویل شوي، چې کوربه هیواد ته د ماموریت د ساتنې واک تر سپارلو پورې د افغانستان اتباعو ته په (بیړني حالت کې) د قونسلي خدمتونو په استثنا سره د ماموریت نورې ټولې چارې درول شوې دي.
په نوي ډیلي کې به د افغانستان اسلامي جمهوریت لوی سفارت د ویانا کنوانسیون د ۴۵ مادې سره سم ټول ملکیتونه کوربه هیواد ته سپارل کیږي.
په اعلامیه کې د سفارت د ډیپلوماټانو له ادرسه له بهرنیو چارو وزات څخه غوښتل شوي چې د ماموریت د بندلو د ارادې په اړه د مخکنیو اړیکو اعتبار تصدیق کړي.
همدارنګه د افغانستان لوی سفارت له هند هیواد څخه غوښتنه کړې چې په هند کې د افغانستان اړوند ملکیتونو پر ټولو وداینو د افغانستان درې رنګه ملي بیرغ ځوړند شي. او تر څنګ یې په کابل کې یوه مشروع حکومت ته د سفارت اړوند ودانۍ او شتمنۍ وسپارل شي.
په هند کې د افغانستان سفارت څخه یوه سرچینه د نوم نه ښودل په شرط افغانستان انټرنشنل ـ پښتو ته وویل: «په تیرو شپږو میاشتو کې د هند حکومت له لوري نورمال ډيپلوماټیک چلند نه راسره کیده. هغه دوه اړخیز تفاهمونه چې د دواړو هیوادونو تر منځ امضا شوي وو د هند له لوري يې درناوی نه کیده. د هند له لوري د ډيپلوماټانو د ویزو نه تمدید کول او بیلابیل فشارونو وو چې خبره تردې ځايه راورسېده.»
هند د نورو هیوادونو په څېر په ۲۰۲۱ کال کې د افغانستان د تېر حکومت د سقوط پر مهال په افغانستان کې خپلي ټولې ډيپلوماټیکي استازولۍ وتړلې. خو د ۲۰۲۲ کال په جون میاشت کې دغه هیواد بیاځلې په کابل کې خپل سفارت پرانیستی.