رویټرز راپور ورکړی، چې روسیې د جمعې په ورځ د ملګرو ملتونو امنیت شورا ته د اسراییل او حماس جګړې په اړه د پرېکړهلیک مسوده واستوله. په دغه پرېکړهلیک کې روسیې وړاندیز کړی، چې د ولسي وګړو پر وړاندې تاوتریخوالی او ټولې ترهګریزې کړنې دې وغندل شي او بشردوستانه اوربند دې رامنځته شي.
د پرېکړهلیک په مسوده کې د اسیرانو د خوشې کېدو، بشري مرستو ته د لاسرسي او د ولسي وګړو د خوندي وتلو غوښتنه هم شوې.
ډیپلوماټانو رویټرز خبري اژانس ته ویلي، چې دغه متن د جمعې په ورځ په غیر علني غونډه کې د اسراییل او حماس د جګړې په اړه د امنیت شورا له ټولو ۱۵ غړو سره شریک شو.
د روسیې د یو مخییز پرېکړهلیک مسوده "اسراییل" او "فلسطین" ته اشاره کوي؛ خو په مستقیم ډول د حماس یادونه نه کوي.
د ملګرو ملتونو د امنیت شورا یوه ډیپلوماټ د نوم د نه ښودلو په شرط رویټرز ته وویل، «روسیې له چا سره مشوره نه ده کړې او په مسوده کې د حماس نوم هم نه دی راغلی؛ نو دوی په ښکاره توګه د شورا له اکثریت سره همغږي نه دي.»
د ملګرو ملتونو د امنیت شورا د پرېکړهلیک د صادرولو لپاره، دغه مسوده لږ تر لږه ۹ رایو ته اړتیا لري او دا هم مهمه ده، چې وړاندیز شوې مسوده د امریکا، بریټانیا، فرانسې، چین او روسیې له ویټو سره مخامخه نه شي.
امریکا په دودیز ډول هم خپل متحد اسراییل د امنیت شورا له هر ډول اقدامه ساتي.
دا لا څرګنده نه ده، چې روسیه به د پرېکړهلیک دغه مسوده رایه اچونې ته وړاندې کړي او که نه؟
دغه پرېکړهلیک په داسې حال کې جوړ شوی، چې ګڼو هېوادونو له اسراییل غوښتي، چې پر شمالي غزې بریدونه ودروي.
تر دې مخکې د اسراییل پوځ د غزې له خلکو غوښتي و، چې په ۲۴ ساعتونو کې د غزې له تړانګې ووځي.
له بلې خوا حماس بیا د دغې سیمې له خلکو وغوښتل، چې د اسراییل د پوځ حکم ته پاملرنه ونه کړي.
ملګرو ملتونو هم ویلي، چې د دغه حکم پلې کول ناشوني دي.
