جان اڅکزی: پر هوايي اډې او ژوب ترهګریزو پېښو ثابته کړه، چې دوه ګاونډیان غواړي موږ وګواښي
د بلوچستان لنډمهاله د اطلاعاتو وزیر جان اڅکزي ویلي:«د میانوالي په هوايي اډې او ژوب کې وروستیو ترهګریزو پېښو ثابته کړه، چې زموږ دوه ګاونډیان غواړي موږ وګواښي.»
د بلوچستان لنډمهاله د اطلاعاتو وزیر جان اڅکزي ویلي:«د میانوالي په هوايي اډې او ژوب کې وروستیو ترهګریزو پېښو ثابته کړه، چې زموږ دوه ګاونډیان غواړي موږ وګواښي.»
د بلوچستان د اطلاعاتو سرپرست وزیر جان اڅکزی یوې خبري ناستې ته ویلي:«له دغو ګاونډیانو څخه، یو یې د ترهګرۍ ملاتړ کوي او بل یې وسلهوالو ته پټنځایونه برابروي.»
که څه هم چې ښاغلي اڅکزي په ډانګ پیېلې توګه د دغو دوو ګاونډیو هېوادونو نومونه یاد نه کړل؛ خو ښکاري داسې چې د هغه موخه هند او افغانستان دی.
وړمه ورځ د پاکستان په میانوالي ولسوالۍ کې وسلهوالو پر یوه روزنیزې هوايي اډې برید وکړ، چې هلته یې یو شمېر الوتکو ته زیان هم واړولو.
له هغه برید وروسته پاکستاني چارواکو یې په اړه ویلي و، چې د وسلهوالو دغه برید یې شنډ کړی او ټول نهه کسه وسلهوال یې ځپلي دي.
دا رنګه په بلوچستان کې هم د امنیتي ځواکونو یو کاروان تر برید لاندې راغلی و، چې له امله یې ۱۴ پوځیان او شپږ وسلهوال وژل شوي وو.
جان اڅکزي وویل چې، د بلوچستان د ژوب په عملياتو کې وژل شويو وسلهوالو کې یو تن یې افغان و.
تر دې وړاندې هم یو شمېر پاکستاني چارواکو پر افغانانو تور پورې کړی و، چې ګواکې په پاکستان کې په ترهګریزو پېښو کې د دوی لاس دی، هغه تورونه چې په وار، وار د طالبانو لهخوا رد شوي دي.
