پاکستاني سرچېنې:اسلاماباد کله هم طالبانو ته نه دي ويلي، چې د قوش تېپې کانال کار دې وځنډوي
د پاکستان د لنډ مهاله حکومت سرچېنو افغانستان انټرنشنل ته ویلي، اسلام اباد په هېڅ یوې ناسته کې د فوش تېپې پر کانال د کار د بندولو غوښتنه نه ده کړې.
سرچېنو ویلي:« طالبان غواړي، چې په دغسې ناسمو تبلیغاتو سره د خلکو عامه افکار له مهمو موضوعګانو څخه بلې خوا ته واړوي.»
د دغو سرچېنو په باور، د قوش تېپې کانال د افغانستان په شمال کې پروت دی چې د تخنیکي پلوه پر پاکستان یې هېڅ ډول اغېز نه پرېوځي.
تر دې وړاندې یو طالب چارواکي ویلي و، چې پاکستاني چارواکو په رسمي غونډو کې د دغې ډلې له مشرانو غوښتي چې د قوش تېپې پر کانال دې چارې بندې کړي.
د طالبانو لهخوا پر رسنیو د څار د ادارې مشر عبدالحق حماد پرته له دې چې د پاکستاني چارواکو نوم یاد کړي رسنیو ته ویلي و، کله چې د دغه هېواد له چارواکو وپوښتل شول چې ولې دې پر دغه کانال کار وځنډول شي ویې ویل: «دغه کانال زموږ په تاوان دی.»
د پاکستان د لنډمهاله ادارې چارواکو وویل، چې په هیڅ ناسته کې د افغان او پاکستاني چارواکو تر منځ دغه شان غوښتنه نه ده شوې.
دغو سرچینو ویلي:«له هغه ځایه چې د قوش تېپې کانال پر پاکستان هیڅ ډول اغېز نه لري؛ نو ځکه منطقي خبره نه ده چې دغسې غوښتنه دې شوې وي.»
طالبانو په تېرو دوو کالو کې د قوش تېپې پر کانال زیات لګښت کړی.
دغه کانال د افغانستان په شمال کې د امو سېند څخه د بلخ، جوزجان او فاریاب په ولایتونو کې پراخه ځمکې خړوبوي.
داسې ویل کېږي، چې د دغه کانال اوبه شاوخوا ۵۵۰ زره هکتاره ځمکه خړوبولای شي.
