ځايي سرچینې: په پخوانۍ ولسي جرګه کې د کوچیانو یو بل استازی حیدر جان نعیمزوی طالبانو نیولی
په کابل کې ځايي سرچېنو افغانستان انټرنشنل ته تایید کړه، چې طالبانو په پخوانۍ ولسي جرګه کې د کوچیانو استازی حیدر جان نعیمزوی د ځمکو د غصب په تور نیولی دی.
دا په تېرو څو ورځو کې د ولسي جرګې دویم غړی دی، چې د طالبانو لهخوا نیول کېږي.
تېره اونۍ په ولسي جرګه کې د کوچیانو یو بل وکیل ملا ترهخیل کوچی د ځمکو د غصب په تور طالبانو نیولی و، چې له هغه وروسته د هغه د کورنۍ درې تنه نور غړي یې هم نیولي وو.
خو حیدر جان نعیمزوی هغه قومي مخور و چې تل به یې د کوچیانو د بېلابېلو قومونو او خېلونو تر منځ شخړې او لانجې د جرګو او مرکو له لارې هوارولې.
هغه د حاجي نعیم کوچي زوی دی، د هغه پلار نعیم کوچی کلونه، کلونه د افغانستان د کوچیانو مشر پاتې شوی، چې د لوړ پوړو چارواکو سره یې ناسته پاسته لرله.
نعیم کوچی هغه کس و چې، د طالبانو په تېر پېر کې یې د افغانستان د پخواني ولسمشر ډاکټر نجیب الله او د هغه د ورور شاه پور احمدزي مړي هم د هغه په منځګړیتوب تر پکتیا پورې ولېږدول شول او د هغوی په پلرنۍ هدېره کې خاورو ته سپارل شوي وو.
که څه هم چې طالبانو تر اوسه د ملا ترهخیل کوچي او حیدر جان نعیمزوی د نیولو په اړه څه نه دي ویلي؛ خو طالبانو تل د دغه شان نیولو په تړاو چوپتیا غوره کړې او ټولې محکمې یې پټ په پټه ترسره کېږي.
