د ایران د بهرنیو چارو وزیر حسین امیرعبدالهیان خپل قطري سیال شیخ محمد بن عبدالرحمن ال ثاني ته ویلي، چې په غزه کې د ملکي تلفاتو زیاتوالی د جګړې د پراخوالي لامل کېږي. د غزې د روغتیا وزارت ویلي چې اسراییل په تیرو ساعتونو کې څو روغتونونه بمبار کړي دي.
د دغه وزارت ویاند اشرف القدره الجزیرې تلویزیون ته ویلي، چې د غزې ښار تر ټولو لوی روغتون الشفاء باندې د اسراییل برید مرګ ژوبله اړولې، خو ده یې نور جزیات ورنه کړل.
اسراییل وايي، حماس د الشفا روغتون او نورو روغتونونو لاندې تونلونو کې خپل د قومندې مرکزونه پټ کړي دي. حماس دغه تورونه رد کړي دي.
د ملکي تلفاتو زیاتوالي یو ځل بیا د ایران اسلامي جمهوریت غبرګون ته اړ کړی دی.
د پریس ټي وي د راپور له مخې د ایران د بهرنیو چارو وزیر له خپل قطري سیال سره په ټیلیفوني تماس کې وویل په غزه کې د ملکی خلکو په خلاف د جنګ زیاتیدا د دغې جګړې د پراخیدا سبب دی.
ایران د حماس ملاتړ کوي، خو وايي، پر اسراییل د حماس د تېرې میاشتې په خونړي برید کې یې هېڅ رول نه درلود.
په داسې حال کې چې تهران د حماس-اسراییل د جګړې د پراخیدو په اړه خبرې کوي، واشنګټن چې د اسراییل اصلي ملاتړی دی، هڅه کوي د ډیپلوماتیکو مشورو او ختیځې مدیترانې ته د سمندري ځواکونو په استولو سره د دې جګړې د پراخیدو مخه ونیسي.
