د اسلامي جمعیت د نور څانګې مشر عطا محمد نور وایي، چې طالبان په افغانستان کې د ۲۲ ترهګرو ډلو کوربهتوب کوي. نوموړي په اېکس پاڼه کې د کابل په لویدیځ کې پر یوه مسافر وړونکي بس موټر ځانمرګي برید ته په اشارې سره وویل چې، طالبانو افغانستان د ترهګرو لپاره په خوندي ځای بدل کړی دی.
هغه د کابل په دشت برچي سیمه کې د مسافر وړونکو په بس موټر د وړمې ورځې ځانمرګی برید غندلی دی.
په دغه برید کې چې شاو خوا دېرشو ولسي خلکو ته په کې مرګ ژوبله واوښته، له پراخو غبرګونونو سره مخ شوی دی.
کېرن ډېکر، ریچارډ بېنټ، ټام وېسټ او یو شمېر نورو شخصیتونو ددغې پېښې د هر اړخیزو څېړنو غوښتنه کړې ده.
اخوا، د بلوچستان د اطلاعاتو وزیر د طالبانو پر ادارې بیا نیوکه کړې او ویلي یې دي چې، د ترهګرو ډلو ټول روزنیز مرکزونه د افغان چارواکو د سترګو پروړاندې کار کوي.
تر دې وړاندې د پاکستان د سرپرست حکومت لومړي وزیر هم ویلي و چې، طالبانو د ترهګرو پر وړاندې د مبارزې په برخه کې هیڅ کوم اقدام نه دی کړی او ان په ځینو برخو کې یې له ترهګریزو ډلو ملاتړ هم کړی دی.
د طالبانو ویاند ذبیح الله مجاهد بیا د انوارالحق کاکړ د دغو څرګندونو په غبرګون وویل چې، دغه ډله د پاکستان د ناامنیو په زیاتېدو کې لاس نهلري.
