د هوايي ځواک د پياوړتيا لپاره د طالبانو هڅې او د پيلوټانو د روزنې ادعا

د دغه وزارت په خبرپاڼه کې راغلي، چې دغه ځواکونه به د پیلوټانو د عملي کارونو د زده‌کړې لپاره هم وپېژندل شي او په ټینګ هوډ سره به تمرینونه ترسره کړي.

د طالبانو د دفاع وزارت په خبرپاڼه کې راغلي چې، د دغې ډلې پیلوټان به د افغانستان له اسلامي او ملي ارزښتونو دفاع وکړي.

تراوسه څرګنده نه ده، چې طالبان په کومو امکاناتو د خپلو ځواکونو لپاره د پیلوټانو د روزنې کورسونه پیل کړي او غواړي، چې په دې توګه خپلو هوايي ځواکونو کې د کارکوونکو شمېر زیات کړي.

د طالبانو په هوايي ځواک کې تر ډېره روسي چورلکې کارول کېږي او د دغو چورلکو شمېر هم ډېر کم دی.

دغه چورلکې ډېری یې د ولایتونو په سفرونو کې د لوړپوړو طالب چارواکو د لېږدولو لپاره کارول کېږی.

د یو شمېر راپورونو له مخې، په افغانستان کې د طالبانو د واکمنۍ د لومړیو میاشتو پرتله اوس د هلیکوپټرو الوتنې کمې شوې دي، ځکه طالبان فني هوایي کارکوونکي نه لري.

په افغانستان کې د جمهوريت له ړنګېدو وروسته د هېواد امنیتي، دفاعي او استخباراتي جوړښتونه له بشپړ سقوط سره مخامخ شول او د دغه هېواد د هوايي ځواک د تخنیکي کارکوونکو یوه لویه برخه د امریکا په ګډون د نړۍ نورو هېوادونو ته پناه یوړه.

طالبانو څو ځلې ادعا وکړه، چې یو شمېر پیلوټان بېرته افغانستان ته ستانه شوي او د طالبانو له هوايي ځواک سره یوځای شوي هم دي.

کابل ته د طالبانو له ننوتلو وروسته د افغان هوايي ځواک لسګونه پیلوټان له ۵۶ الوتکو او پوځي چورلکو سره ازبکستان او تاجکستان ته وتښتېدل.

سره له دې چې طالبانو په وار، وار له تاجکستان او ازبکستان څخه د دغو چورلکو او الوتکو د بېرته راګرځولو غوښتنه کړې؛ خو دغو هېوادونو طالبانو ته د پخواني افغان حکومت د چورلکو او الوتکو له ورکولو ډډه کړې ده.

د افغانستان د پخواني حکومت پر مهال طالبانو ته په هوايي بریدونو کې درانه زیانونه اوښتي او دا ډله اوس غواړي خپل هوايي ځواک پیاوړی کړي.