د فرانسې ولسمشر ویلي، چې اسراییل باید سمدلاسه په غزه کې د ښځو او ماشومانو وژنه ودروي او پر دوی بمباري د توجیه وړ نه ده. امانوېل مکرون د جمعې په ورځ له بيبيسي سره په ځانګړې مرکه کې وویل، چې اوربند د اسراییل په ګټه دی.
ښاغلي مکرون په دې مرکه کې وویل، اسراییل حق لري چې له ځانه دفاع وکړي؛ خو ټینګار یې وکړ:« موږ له اسراییل غواړو، چې سمدستي په غزه بمباري بنده کړي.»نوموړي زیاته کړه، چې فرانسې د حماس «ترهګریزې» کړنې «په ښکاره ډول غندلې» دي.فرانسه د اسراییل او ځینو لویدیځو هېوادونو په څېر، د حماس فلسطیني ډله «ترهګره» ډله ګڼي.د فرانسې ولسمشر دغه موضوع د غزې د جګړې په اړه د پاریس د سولې د کنفرانس په ترڅ کې یاده کړه.د هغه په وينا، په دې غونډه کې ټولو حکومتونو او ادارو په روښانه توګه وويل چې په جګړه کې له بشري وقفې او له اوربند پرته بله لار نه شته.د بيبيسي د راپور له مخې، ښاغلي مکرون وویل:« ماشومان، ښځې او بوډاګان په بمونو الوزول کېږي او وژل کېږي. د دې لپاره هیڅ دلیل یا مشروعیت نه شته؛ نو له همدې امله موږ له اسراییل غواړو، چې پر هغوی بمبارۍ بندې شي.»امانوېل مکرون زیاته کړه، دی په داسې دریځ کې نه دی چې ووایي د غزې په جګړه کې نړۍوال قوانین تر پښو لاندې شوي.په غزه کې د اسراییل هوايي، ځمکني او سمندري عملیات تر هغه وروسته پیل شول، چې د (تلې په ۱۵مه) د حماس لهخوا د اسراییل پر سویلي سیمو بریدونه وشول.د اسراییل پوځ وايي، له هغه وخت راهیسې یې په غزه کې تر ۱۵۰۰۰ ډېر هدفونه بمبار کړي دي.په همدې حال کې په غزه کې د حماس د روغتیا وزارت ویلي، چې د اسراییل په بریدونو کې تر یوولس زرو زیات کسان وژل شوي دي.په غزه کې د ملکي تلفاتو زیاتوالي په نړۍواله کچه پراخې نیوکې راپارولې دي.له دې سره د اسراييل لومړي وزير بنيامين نتنياهو ويلي، اوربند به تر هغه وخته نه عملي کېږي چې د حماس لهخوا ٢٤٠ اسراييلي برمته شوي خوشې شوي نه وي.
د اسټرالیا حکومت ویلي چې هر کال شاوخوا ۲۸۰ کسانو ته ویزې ورکوي.
اسټرالیایي ورځپاڼي سانډي هرالډ مارنینګ راپور ورکړی چې د تووالو ټول ۱۱ زره او ۲۰۰ اوسیدونکو ته به پناه ورکړل شي که د اقلیمي بدلون له امله دې کوچني هېواد کې استوګنه ستونزمنه شي.
وړاندوینه کیږي چې د تووالو د پلازمینې فونافوټي نیمایي برخه به تر ۲۰۵۰ میلادي کاله پورې له اوبو لاندې شي.
د استرالیا د لومړي وزیر انټوني البانیز او د تووالو د حکومت ترمنځ د تړون له مخې د دغه هېواد اوسیدونکي په استرالیا کې ژوند، کار او زدکړې کولی شي.
استرالیا هم ژمنه کړې چې د طبیعي پېښو، ساري ناروغیو یا پوځي یرغل پر وړاندې له دغه کوچني هېواد سره به مرسته وکړي.
د تووالو د بهرنیو چارو وزیر په ۲۰۲۱ میلادي کال کې د اوبو له منځه د ملګرو ملتونو د اقلیم په سرمشریزه کې وینا وکړه
اسټرالیا د نوې هوکړې ځینې برخې د ارام سمندر دې هېواد کې د چین د نفوذ په اړه د اندېښنې له امله دي.
دا تړون اسټرالیا ته اجازه ورکوي چې د تووالو او چین ترمنځ هر ډول امنیتي تړون یا دفاعي همکارۍ ویټو کړي ترڅو د چین د نفوذ مخه ونیسي.
په ورته وخت کې، تووالو یو له هغو ۱۳ هېوادونو څخه دی چې له تایوان سره رسمي ډیپلوماتیکې اړیکې لري.