د غزې سرحدي چارواکي وايي، د رفح لاره به نن یکشنبه (د لړم ۲۱مه) بېرته پرانېستل شي. چارواکو ویلي و چې، د رفح لاره به په سیمه ییز وخت د سهار په نهو بجو په غزه کې د بهرنیو وګړو، د هغوی د خپلوانو او روغتیایي کارکوونکو پر مخ پرانېستل شي.
رفح غزې ته د ننوتلو یوازینۍ لاره ده چې د اسراییل لخوا نه مهاریږي او د بشري مرستو د لیږلو او د ناروغانو د اېستلو له پاره خورا مهمه ده.
مصري سرچینو ویلي چې، له دغې لارې څخه د بهرنیانو او فلسطینیانو چې بیړنۍ درملنې ته اړتیا لري، د جمعې په ورځ د اېستلو بهیر وځنډول شو.
اوس مهال په غزه کې روغتیایي سیسټم د سقوط په درشل کې دی، د حماس او اسراییل ترمنځ نښتې د دې تړانګې په شمال کې روغتونونو ته نږدې دوام لري.
د فلسطین سرې میاشتې خبرداری ورکړی چې اسراییلي ټانکونه د غزې په تړانګه کې القدس روغتون ته نږدې شوي دي.
فلسطیني سرچینو د شنبې په ورځ د لړم په ۲۰مه خبر ورکړ چې اسراییلي پوځ د غزې په تړانګه کې درې روغتونونه کلابند کړي دي.
د دغو سرچینو په وینا، د شفاء روغتون سره اړېکه پرې شوې ده.
