بلومبرګ راپور ورکړی چې د غزې په تړانګه کې د حماس پر ضد د اسراییل پوځي عملیات د ورځې شاوخوا ۲۶۰ میلیون ډالر لګښت لري.
د دې رسنۍ په وینا، د غزې په جګړه کې اسراییل ته له لومړنیو اټکلونو زیات زیان اوښتی دی.
بلومبرګ په دې راپور کې چې د یکشنبې په ورځ (د لړم ٢١مه) خپور شو، لیکلي چې د حماس پر ضد د اسراییل د جګړې لګښت د اسراییلي حکومت پر بودجه اغېز کړی او د بودجې کسر د تېر کال په پرتله اوه برابره زیات شوی دی.
تر دې مخکې د اسراییل اقتصادي ورځپاڼې کیلکالست د اسراییل له پاره د غزې د جګړې لګښت شاوخوا ۵۱ میلیارډه ډالره اټکل کړی و.
دغې ورځپاڼې لیکلي چې دا اټکل د یوې داسې جګړې له پاره دی چې د ۸ او ۱۲ میاشتو ترمنځ به دوام وکړي او د لبنان د حزب الله، ایران او د یمن د حوثي یاغیانو له ګډون پرته به د غزې تړانګه پورې محدود وي.
وروسته له هغه چې حماس د تلې میاشتې په ۱۵مه پر دغه هیواد برید وکړ، اسراییل خپل هوايي، سمندري او ځمکني بریدونه پیل کړل او لا هم دوام لري.
د اسراییل لومړي وزیر بنیامین نتنیاهو په وار وار ټینګار کړی چې د حماس تر بشپړې تباهۍ پورې به جګړه روانه وي.
د فلسطین د روغتیا وزارت د شمېرو له مخې پر غزې د اسراییل په بریدونو کې تر اوسه له ۱۱ زرو ډېر کسان وژل شوي دي.