د طالبانو د کورنیو چارو وزارت رسنیو ته ویلي، له تېرو شپږو میاشتو راهیسې یې تر ۳۰ پورې کسان د انساني قاچاق په تور نیولي او قانون ته یې سپارلي دي؛ خو دا یې نه دي ویلي چې له دغو نیول شویو کسانو څخه یې څه وړ اعترافونه اخیستي دي.
له هغه مهاله چې په افغانستان کې طالبان واک ته رسیدلي، د انساني قاچاق کوونکو بازارونه تاوده شوي او ګڼ افغانان په تېره بیا ځوان کول غواړي له دغه هېواده پښې سپکې کړي او اروپا ته په مرګونو لارو د تګ له پاره زړه ښه کړي.
د د ې تر څنګ یو شمېر خلک د قاچاق کوونکو له لوري د دوی د کورنۍ د غړو او خپلوانو د ربړونې او یرغمل کېدو شکایت هم کوي.
د راپورونه له مخې ایران، ترکیې او یو شمېر اروپایي هېوادونو ته د انسانانو قاچاق کوونکي افغانان په لارو ربړوي، پیسې یې لوټوي او د یرغملولو وروسته یې له کورنیو د پیسو غوښتنه کوي.
تر ډېره په قاچاقي لارو تګ د افغانانو له پاره له مرګونو پېښو سره هم مل وي؛ خو دوی وايي چې په هېواد کې وزګارتیا او نا روښانه برخلیک دوی دې ته اړ ایستي چې پر دغو لارو تګ ته زړه ښه کړي.
دغه ځوانان تر ډېره د نیمروز ولایت څخه په قاچاقي لارو ایران ته اوړي او بیا له هغه ځایه ترکیې او وروسته د اوبو له لارې اروپايي هېوادونو ته مخه کوي.
داسې راپورونه هم افغانستان انټرنشنل ته رسېدلي، چې د ایران سره په پوله په نیمروز ولایت کې طالبان له هغو موټرو پیسې اخلي چې افغانان په قاچاقي ډول ایران ته لېږدوي.
