د روسیې د ولسمشر استازی ضمیر کابلوف د دوشنبې په ورځ ټاس خبري اژانس ته وویل چې، ملګري ملتونه به په نږدې راتلونکي کې د افغانستان د چارو په اړه د هېوادونو د ځانګړو استازو په حضور کې یوه غونډه جوړه کړي.
هغه وویل: «موږ د افغانستان په اړه د ډېرو نړۍوالو پلانونو د جوړولو په حال کې یو.»
ښاغلي کابلوف له ځانګړو استازو سره د ملګرو ملتونو د عمومي منشي د نوې غونډې د ځای او د بحث وړ موضوعاتو په اړه له څه ویلو ډډه وکړه.
د دې غونډې په جوړېدو سره به دا د افغانستان په چارو کې د هېوادونو له ځانګړو استازو سره د ملګرو ملتونو د سرمنشي دویمه ناسته وي.
مخکینۍ غونډه د غویي په ۱۱مه او ۱۲مه په قطر کې د تړلو دروازو تر شا جوړه شوې وه او د خبرو جزییات یې له خلکو سره شریک نه شول.
د ملګرو ملتونو وياند د وري په ٣١مه ویلي و چې، په دې غونډه کې د بحث موضوع د افغانستان پر وړاندې د شته ننګونو په اړه د هېوادونو د نظرونو د اجماع جوړول دي.
د افغانستان په چارو کې د روسيې استازي همداراز ویلي، چې په افغانستان کې د ملګرو ملتونو د سرمنشي ځانګړي همغږي کوونکي فريدون سېنيرلي اوغلو د افغانستان په اړه يو راپور چمتو کړى او د دغه هېواد په چارو کې یې د يادو هېوادونو استازو ته وړاندې کړى دى.
