پرلت وهونکي: د جمعې په ورځ به د سوېلي پښتونخوا زرګونه ماشومان د پرلت په ملاتړ لاریون وکړي

AP ۱۴۰۲ لړم ۲۵

د چمن پرلت وهونکي وايي، سبا د جمعې په ورځ د (لړم ۲۶مه) به د ماشومانو لاریون د پرلت له ځایه پیل او د چمن د امنیت د مسول تر دفتره به دوام وکړي.
په دغه لاریون کې به زرګونه هغه ماشومان ګډون ولري چې عمرونه یې د شپږو څخه تر دوولسو کلو پورې وي.

د سپین بولدک - چمن پر دروازه د پاسپورټ په غبرګون کې د پرلت نن پنج شنبه د (لړم ۲۵مه) ۲۷مه ورځ روانه ده.
د پرلت د مرکزي کمیټې غړی حافظ یوسف وايي، په لاریون کې به هغه ماشومان ګډون کوي چې عمرونه يې د شپږو کلو څخه تر ۱۲ کلو پورې دي.
نوموړی وايي: «د جمعې په ورځ سهار نهه بجې به د ماشومانو لاریون وي، دیني عالمان، عام خلګ او د چمن ټول ولس دې خپل ماشومان د پرلت سیمې ته راولي، چې د خپلو مشرانو په ملاتړ د پرلت له سیمې څخه د چمن د امنیت د مسول تر دفتره په لاریون کې ګدون وکړي.«
د چمن د لغړي اتحاد مشر غوث الله یو ځل بیا د پاکستان له حکومته غوښتنه کوي چې له خپلې پرېکړې په شا شي.
نوموړی وايي: « د چمن ولس دا ژمنه کړې، چې دا ځل به خپله غوښتنه د پاکستان په حکومت مني. موږ ماشومان په دې خاطر پرلت ته رابولو چې هغوی نړۍ ته وښیي چې د دغو ماشومانو د پلرونو پر کاروبار بندیزونه او په زور حکومت خپلې پرېکړي په هغوی مني.»
دغه پرلت وهونکو دوه ورځې وړاندې د پرلت په استازیتوب پنځه کسیزه ډله اسلام اباد ته استولې ده چې هلته د لویو سیاسي ګوندونو ملاتړ خپل کړي.
د تېرو ۲۷ ورځو راهیسې په چمن کې زرګونو کسانو د پاکستان د هغې پرېکړي په غبرګون پرلت وهلی، چې د سپین بولدک - چمن پر دروازه دې تګ راتګ په پاسپورټ او وېزه تر سره شي.

نور خبرونه

رادیو