د جرمني د مسلمانانو په شورا کې د هامبورګ اسلامي مرکز غړیتوب لغوه شو

د هامبورګ اسلامي مرکز، د جرمني د پولیسو له خوا ایران پورې اړوند د دغه مرکز دفترونو له تلاشۍ وروسته، خپل غړیتوب په دې شورا کې له لاسه ورکړ.
د جرمني د کورنیو چارو وزارت اعلان وکړ، چې دغه مرکز د «لبنان له حزب الله ترهګرې ډلې» سره د اړیکو په لرلو او د جرمني د اساسي قانون خلاف پر عمل کولو تورن دی.
په ټولیز ډول، د هامبورګ د اسلامي مرکز پورې اړوند ۵۴ ودانۍ په اوو ایالتونو هامبورګ، برلین، بایرن، نیدرزاکسن، هسن، بادن-وورتمبرګ او نوردراین-وستفالن کې پلټلې دي.
د جرمني د کورنیو چارو وزیرې نانسي فایزر د دغو ودانیو د پلټنې په هکله چې ادعا کیږي د لبنان له حزب الله سره تړاو لري، وویل، چې د اسلامپالو فعالیتونه څارل کیږي؛ په ځانګړې توګه په اوسني حالت کې چې ډیری یهودیان د خطر احساس کوي.
فایزر ټینګار وکړ چې برلین به د "یهود او اسراییل ضد" حرکتونه ونه زغمي.
په تیرو ورځو کې د جرمني ټولو سیاسي ګوندونو د حزب الله لبنان په څېر ډلو سره د اړیکې لرلو له امله د هامبورګ اسلامي مرکز د تړلو غوښتنه وکړه.
د اسراييل او حماس تر منځ د جګړې له پيل څخه مخکې، د جرمني ډموکراسۍ ته د ګواښ له امله د هامبورګ او فرانکفورت اسلامي مرکزونه د دې هېواد د چارواکو او سیاسي فعالانو له خوا تر نیوکو لاندې وو.