د غزې د شفا روغتون یوه ډاکټر د جمعې په ورځ وویل چې اسراییلي ځواکونو د روغتون د تلاشۍ پر مهال «هیڅ ونه موندل». د اسراییل پوځ ویلي چې د حماس د قوماندې یو مرکز تر دغه روغتون لاندې دی او هلته یې یو تونل او د وسلو یو موټر موندلی دی.
د اسراییل پوځ د خپلې ادعا د ثابتولو لپاره ویډیوګانې او عکسونه هم خپاره کړي.
ډاکټر احمد المخللاتي رویټرز ته د تلیفوني خبرو له لارې وویل: "دوی هیڅ ونه موندل. له دوی سره کوم مقاومت ونه شو. د روغتون په سیمه کې پر دوی یو ډز هم ونه شوه."
دغه روغتون چې له ناروغانو او فلسطیني کډوالو ډک دی او په سختۍ سره فعالیت کوي، نړۍ ته په لویه اندېښنه بدل شوی.
مخللاتي وویل چې د اسراییل پوځ روغتون ته له ننوتلو راهیسې یو څه خواړه چمتو کړي، خو کافي نه دي.
د شفا روغتون د ماشومانو څانګې مشر ډاکټر محمد تاباشا د دوشنبې په ورځ وویل، چې په روغتون کې درې ماشومان د ستونزو له امله مړه شوي او ۳۶ نور ماشومان له خطر سره مخ دي.
هغه د جمعې په ورځ وویل:«تر پرونه یې شمېر ۳۶ ته رسیده. له نېکه مرغه هیچا خپل ژوند له لاسه نه دی ورکړی.»
