د امریکا د بهرنیو چارو وزارت د طالبانو لهخوا د نړۍوالو مرستو د کارونې په اړه د افغانستان د بیارغونې لپاره د امریکا د څارونکې ادارې یا سیګار د څرګندونو په غبرګون کې ویلي، چې د مرستو د کارولو په اړه د امریکا د څارنې بهیر "غښتلی" دی.
د امریکا د بهرنیو چارو وزارت ویاند وویل: «موږ خپلې ارزونې ته دوام ورکوو او د اړتیا په وخت کې به بیاکتنه هم وکړو.»
د امریکا د بهرنیو چارو وزارت ویاند مټیو مېلر د پنجشنبې په ورځ د کانګرس په غونډه کې د جان ساپکو د څرګندونو په اړه په زغرده له څرګندونو ډډه وکړه او د نوموړي خبرې یې نېغ په نېغه رد نه کړې.
مېلر د افغانستان انټرنشنل د خبریال عارف یعقوبي د پوښتنې په ځواب کې وویل، چې امریکا په افغانستان کې د باور وړ هغو نړۍوالو سازمانونو سره کار کوي چې د افغانستان په څېر په ننګونکو هېوادونو کې د کار کولو پراخه تجربه لري.
هغه زیاته کړه:«موږ ارزونې ته دوام ورکوو ترڅو ډاډمن شو، چې مرستې اړو خلکو ته رسيږي. زموږ همکاران د مرستو د ناوړه ګټې اخېستنې د مخنیوي له پاره لازمې تابیاوې لري او که چیرې د مرستو په برابرولو کې له سره غور کولو ته اړتیا وي، موږ به په دې برخه کې ګامونه واخلو.»
د افغانستان د بیارغونې له پاره د امریکا د څارونکې ادارې یا سیګار د (لړم په ۲۳مه) د کانګرس په استماعیه غونډه کې وویل، چې طالبان د نړۍوالو مرستو د پام وړ برخه جیب ته اچوي.
جان ساپکو ویلي، چې د امریکا او نړۍوالې ټولنې مرستې د ترهګرو د تغذیې په سرچینه بدله شوې او د طالبانو د لیرې کولو له پاره بل غوراوی هم نه شته.
د امریکا ځانګړي څارونکي د سه شنبې په ورځ د استازو جرګې د بهرنیو اړیکو کمیټې ته وویل، چې طالبان له بهرنیو پروژو باج اخلي او دغه ډله هغه کسان، د مرستو د وېش له پاره ځانګړې کوي چې د دوی په خوښه وي.
جان ساپکو دا هم ویلي و، چې طالبان پر ملګرو ملتونو او نورو نا دولتي موسسو فشار راوړي، چې د مرستو په وېش کې د دغې ډلې غړي او د هغوی خپلوان وګماري.
