د ننګرهار ولایت د طالبانو اطلاعاتو او فرهنګ ریاست ویلي چې د مېملې د لرغوني بڼ د رغولو په پار یې سلامشورې پیل کړي، ښايي ډېر ژر به د دغه بڼ د رغولو چارې پیل شي. دغه تاریخي بڼ چې شاوخوا پنځه پیړۍ پخوا د شاه جهان له خوا جوړ شوی لرغونی تاریخ لري او هر کال زرګونه خلک یې لیدو ته ورځي.
د میملې باغ د جلال اباد له ښاره څلوېښت کیلو متره لرې پروت دی چې د دغه بڼ د نرګس ګلونه د سیمې د هېوادونو تر څنګ په اروپايي هېوادونو کې هم خوښونکي او تاوده بازارونه لري.
د جمهوریت تر ړنګېدو مخکې هم د اطلاعاتو او فرهنګ وزارت د دغه بڼ د بیا رغونې له پاره تګلارې جوړې کړې وې، خو هغه مهال د بڼ په شاوخوا سیمو کې طالبانو مورچلې لرلې او د وخت حکومت یې د رغولو چارو ته زړه ښه نه کړ.
د میملې بڼ د ښایسته لوړو څنارونو او صبر ونو تر څنګ د مالټو، نارنجو او لیموګانو پریمانه ونې لري چې هر کال ترېنه پرېمانه حاصلات ټولیږي او د ننګرهار د کانال ریاست ته لېږدول کیږي.
