د جرمني په کولن ښار کې د طالب چارواکي د وینا په اړه له غبرګونونو وروسته، په دغه ښار کې د افغانانو فرهنګي ټولنې، چې ویل کېږي د دې وینا د زمینې د برابرولو تر شا یې لاس درلود، اعلان وکړ چې د دوی له نوم څخه «ناوړه ګټه» پورته شوې ده.
په کولن ښار کې د افغانستان فرهنګي ټولنې د جمعې په ورځ (د لړم ۲۶مه) په یوه خبرپاڼه کې لیکلي چې د دغې ټولنې «ناسم استازیتوب» په کلکه غندي او د دې ادارې شهرت ته یې زیان رسولی دی.
تر دې مخکې په جرمني کې د دیني چارو له پاره د ترکيې اسلامي ټولنې اعلان کړی و، چې دغې ټولنې د ديني کنفرانس د جوړولو غوښتنه کړې وه، خو پر ځاى يې د دغې ټولنې په سازمان کې سياسي کنفرانس جوړ شو.
دغې ټولنې ټینګار کړی چې له دې اتحادیې سره هیڅ تړاو نه لري او نه یې په دې برخه کې کوم تړون لاسلیک کړی او نه هم د دغې اتحادیې کوم غړي په دې کنفرانس کې ګډون درلود.
په کولن ښار کې د افغانستان فرهنګي ټولنې د دغه طالب چارواکي د وینا له پاره د کنفرانس جوړېدل «د دې ټولنې له ښه نوم څخه ناوړه ګټه اخیستنه، بې شرمي او جرئت» بللی او په دې اړه یې د قانوني چلند غوښتنه کړې ده.
دې اتحادیې د کنفرانس له سمبالونکو سره هر ډول تړاو هم رد کړی او ویلي یې دي چې د هغوی د"نا قانونه کړنو" څخه "ځان لرې کوي".
تر دې مخکې د جرمني د بهرنیو چارو وزارت د یوې لنډې اعلامیې په خپرولو سره په کولن ښار کې د طالبانو د خوړو او درمل جوړولو د څانګې د مشر شتون او وینا په کلکه وغندله او جرمني ته یې د نوموړي د ننوتو په اړه د څیړنو خبر ورکړ.
په هغو انځورونو کې چې ښاغلي عمر له دغې غونډې څخه په خپله پاڼه خپاره کړي، لیدل کېږي چې د ده وینا ته د پام وړ افغانان ناست دي.
دغه طالب چارواکي په خپلو خبرو کې د طالبانو د حکومت او د دغې ډلې د مشر ستاینه کړې او ټینګار یې کړی چې خلک باید د رسنیو خبرونو ته له پام کولو پرته د دغې ډلې "لاسته راوړنو" ته پام وکړي.
