مایکل مککال: اروپايي هېوادونو ته د طالب چارواکي سفر د منلو وړ نه دی
د امریکا د استازو د جرګې د بهرنیو اړیکو د کمېټې مشر مایکل مککال ځینو اروپايي هېوادونو ته د طالبانو د یوه چارواکي د سفر په اړه غبرګون ښودلی او ویلي یې دي، چې دا د نه منلو وړ ده.
د امریکا د استازو د جرګې د بهرنیو اړیکو د کمېټې مشر مایکل مککال ځینو اروپايي هېوادونو ته د طالبانو د یوه چارواکي د سفر په اړه غبرګون ښودلی او ویلي یې دي، چې دا د نه منلو وړ ده.
مکال د یکشنبې په ورځ وویل: "هېوادونه باید د طالبانو پر غړو د سفر بندیز په پراخولو او پلي کولو کې په ګډه عمل وکړي".
د یکشنبې په ورځ د امریکا د استازو د جرګې د بهرنیو اړیکو کمېټې یو شمېر اروپايي هېوادونو ته د طالبانو د خوړو او درملو د ملي ادارې د مشر عبدالباري عمر د سفر په اړه خبر خپور کړ او په دې اړه یې د امریکا د متحدو ایالتونو د استازو د جرګې غبرګون په خپل اکونټ کې خپور کړ.
افغانستان انټرنشنل ـ پښتو ته رسېدلي پېغامونه ښیي چې د طالبانو د خوړو او درملو ادارې مشر له ګڼو ډیپلوماټانو او سفیرانو سره د لیدنې لپاره تماس نیولی.
له عبدالباري عمر سره په چک، اسپانیا او هالنډ کې افغان ډېپلوماټانو لیدلي؛ خو نورو هېوادونو کې ډېپلوماټانو ور سره لیدنه رد کړې ده.
افغانستان انټرنشنل ـ پښتو ته نن یکشنبه د ( لړم ۲۸ مه ) څو سرچینو وویل، چې په هالند کې د روغتیا نړۍوال سازمان له ناستې وروسته طالبانو د خوړو او درملو ادارې مشر شاوخوا دوه اوونۍ د اروپا په یو شمیر هیوادونو کې ګرځیدلی او د خپلې ډلې لپاره یې سیاسي حرکتونه کړي دي.
د جرمني په کولن کې د نوموړي تر څرګندونو وروسته جرمن چارواکو د نوموړي په ورتګ بې خبري وښوده او ویې ویل، چې په دې هکله پلټنې کوي.
ور پسې د هالنډ د روغتیا وزیر هم له نوموړي سره د روغتیا نړۍوال سازمان غونډه کې په انځور اخیستو بښنه وغوښته او ویې ویل چې نوموړی یې نه پېژاند.
خو افغانستان انټرنشنل ته په دغه غونډه کې د عبدالباري عمر رسېدلی کارت ښيي چې دغه طالب چارواکي د افغانستان د خوړو او درملو ادارې په استازیتوب په دغه غونډه کې کډون کړی دی.
