د طالبانو علومو اکاډمي: په تعلیمي او تحصیلي نصاب کې دې د "حدود او قصاص پېژندنه" اضافه شي
د طالبانو د علومو اکاډمۍ د دې ډلې د پوهنې او لوړو زده کړو له وزارته غوښتي، چې د افغانستان د ښوونځیو او پوهنتونونو په درسي نصاب کې دې «حدود او قصاص پېژندنه» شامله کړي. دغه بنسټ له طالبانو هم غوښتي چې د هغو کسانو پر وړاندې چې دغه ډله یې «باغیان» بولي، اسلامي شریعت نافذ کړي.
باختر اژانس د طالبانو تر کنټرول لاندې د يکشنبې په ورځ ( د لړم په ٢٨مه ) خبر ورکړ، چې د دغې ډلې د علومو اکاډمۍ د "شريعت د حدودو د تطبيق او د امنيت په تامينولو کې د هغې د رول" په اړه يو پروګرام جوړ کړی و.
د دې پروګرام برخه والو یو پرېکړه لیک صادر کړی، چې پکې راغلي: "د امکان تر حده د ډېرو خلکو د منلو لپاره باید حدود او قصاص د خلکو په مخکې په عام محضر کې پلي شي".
د ۱۴۰۰ لمریز کال په اسد میاشت کې واک ته د بیرته راستنېدو وروسته طالبانو په عام محضر کې ډېری خلک په مختلفو تورونو په دورو ووهل.
دا ډله د خپلو خلکو او نورو اتباعو پر وړاندې د "دوه ګوني چلند" په کارولو تورنه ده.
طالبان هم په دې تورن دي، چې د خلکو د نیولو او محاکمه کولو پر مهال یې د عادلانه عمل اصول او طریقې نه مراعات کړې دي.
