د کډوالو نړۍوال سازمان وايي، د افغان راستنېدونکو ورځنی شمېر له ۲۰۰ څخه ۱۷ زرو ته لوړ شوی دی.
د دغه سازمان په وینا، په افغانستان کې له اوسني بشري ناورین سره، دغه کډوال له مبهم او ناڅرګند راتلونکي سره مخ دي.
د ملګرو ملتونو دغه سازمان له پاکستانه د راستنېدونکو د وضعیت په اړه په تازه خپاره کړي راپور کې لیکلي، چې ډېری یې له پاکستانه د وتلو او د خپلو شتمنیو پرېښودو ته اړ شوي دي.
دغه سازمان ټینګار کوي چې«افغانستان ته راستنیدونکي خلک ډېر زیانمنونکي دي او په پولو او اوږدمهاله سیمو کې بیړني ملاتړ ته اړتیا لري.»
د کډوالۍ د نړۍوال سازمان د تازه شمېرو له مخې، په تېرو دوو میاشتو کې شاوخوا ۳۷۵ زره افغانان له پاکستانه وتلي، چې ډېری یې د تورخم او سپین بولدک له لارې پاکستان ته اوښتي دي. له بلې خوا پاکستاني چارواکو ویلي دي چې د ایستل شویو کډوالو شمېر له ۴۰۰ زرو څخه اوښتی دی.
د کډوالۍ نړۍوال سازمان او د جورج ټاون پوهنتون له خوا په یوه تازه خپاره شوي راپور کې هم راغلي چې افغانستان د داخلي بې ځایه شویو د شمېر له پلوه په نړۍ کې درېیم هېواد دی.
د دې راپور لیکوالانو د افغان کډوالو د وضعیت په اړه په خپلو موندنو کې لیکلي چې د بې ځایه شویو لپاره د مناسبو کورونو جوړول د هغوی د اقتصادي خپلواکۍ د تضمین او پر بشري مرستو د هغوی د تکیه د کمولو لپاره یوه اساسي موضوع ده.
ملګري ملتونه په افغانستان کې بشري ناورین او په میلیونونو داخلي بې ځایه شویو ته په اشارې سره وايي، چې له راستنیدونکو سره د عاجلو مرستو د دوام لپاره عاجلو مالي سرچینو ته اړتیا ده.
د ملګرو ملتونو دغه اژانس ټینګار کوي چې د جبري راستنیدونکو شمېر هره ورځ په بې ساري ډول مخ په زیاتیدو دی او دغو راستنیدونکو لپاره مخکې له دې چې ټاکل شویو سیمو ته ولاړ شي لویو مرکزونو ته اړتیا ده چیرې چې له تګ دمخه مرستې ترلاسه کړي.