د پخوانۍ قامي اسمبلۍ غړی او د ملي ډیموکراټیک غورځنګ مشر محسن داوړ په خپله اېکس پاڼه د طالبانو وروستي غبرګون په ځواب کې لیکلي، چې د هرات امنیتي ناستې ته طالبانو داسې غبرګون ښودلی لکه د افغانانو رښتیني استازي چې وي.
هغه لیکلي:« دوی د راولپنډۍ پروژه ده او د دوی هویت ترهګري ده.»
هغه زیاته کړې:« هغه کسان چې د خلکو ملاتړ لري خپل مشروعیت د ټاکنو له لارې ثابتوي؛ نه د ډارولو او ترهې له لارې.»
محسن داوړ دغه خبرې د هرات امنیتي ناستې ته د طالبانو هغه غبرګون په ځواب کې کړي، چې څو ورځې وړاندې د دغه ډلې د امنیه قومندانۍ ویاند خالد ځدراڼ په خپلې اېکس پاڼه لیکلي و:« هغه دوه مخي چې په لر کې پر عدم تشدد او په بر کې بیا پر تشدد باور لري تل د افغان وژنې نندارچیان پاتې شوي.»
هغه د محسن داوړ د تصویر په خپرولو سره لیکلي و:« دا ګوډاکۍ څېرې اوس دلته پېژندل شوي، په ټولنه کې یې هغه وقار، عزت او حیثیت له لاسه ورکړی دی.»
محسن داوړ د هرات امنیتي ناستې ته د وینا پرمهال ویلي و:« په افغانستان کې په زور واکمني نه شي کېدی؛ طالبان د ټوپک په زور افغانستان ته راغلي او باید د ټوپک په زور له افغانستانه واېستل شي.»
خو د محسن داوړ دغه څرګندونو په پښتونخوا کې پراخ ملاتړ له ځانه سره درلود.