د چین د بهرنیو چارو وزارت ویاند ویلي، د دې لپاره چې بېجېنګ د طالبانو حکومت په رسمیت وپېژني؛ دغه ډله باید په بنسټیزه توګه د حکومت کولو طریقه بدله کړي. وانګ ونبین د لیندنۍ په ۱۴مه نېټه وویل، چې د طالبانو د حکومت ډېپلوماټیک رسمیت د «سیاسي اصلاحاتو» پلي کولو ته اړتیا لري.
هغه زیاته کړه؛ مخکې له دې چې د طالبانو حکومت په بشپړه توګه په ډېپلوماټیکه توګه په رسمیت وپېژندل شي، باید داخلي امنیت او له ګاونډیانو سره اړیکې ښې کړي.
بېجېنګ تر دې دمه د طالبانو حکومت په رسمیت نه پېژني؛ خو له طالبانو سره یې ډېپلوماټیکې اړیکې ساتلي او د دواړو لورو چارواکي رسمي لیدنې - کتنې کوي.
وانګ ونبین وویل: "موږ هیله لرو، چې طالبان به د نړۍوالې ټولنې هیلو ته ډېره پاملرنه وکړي، یو خلاص او ټول شموله سیاسي جوړښت رامینځته کړي او منځلاري او باثباته کورني او بهرني سیاستونه غوره کړي، ترڅو د نړۍوالې ټولنې سره یوځای شي".
هغه دا هم وویل: "چین له طالبانو څخه غوښتنه کړې چې په کلکه له ترهګرۍ سره مبارزه وکړي او د نړۍ له ټولو هېوادونو په ځانګړي توګه ګاونډیو هېوادونو سره په همغږۍ کې ژوند وکړي او ژر تر ژره له نړۍوالې ټولنې سره یوځای شي".
د دې پوښتنې په ځواب کې چې ایا چین اوس د طالبانو حکومت په رسمیت پېژني؟ د چین د بهرنیو چارو وزارت ویاند وویل: "چین تل په دې باور دی چې افغانستان باید له نړۍوالې ټولنې و نه ایستل شي".
خو له هغه وخته چې طالبانو په افغانستان کې واک تر لاسه کړی، هېڅ هېواد د دغې ډلې واکمني په رسمیت نه ده پېژندلې.
