وزیر ځدراڼ: طالبانو په غیرقانوني ډول زموږ کور نړولی او اوس ځواب هم نه راکوي

AP ۱۴۰۲ لیندۍ ۱۴

څلور ورځې وړاندې طالبانو په خوست کې د قومي مشر او د ولسي جرګې د پخواني غړي پاچا خان ځدراڼ کلا ونړوله.

په ټولنیزو شبکو کې د طالبانو په حواله ویلي شوي وو، چې دا ځمکه غصب شوې ده؛ خو د پاچا خان ځدراڼ ورور وایي، طالبانو یې بې دلیله کور نړولی او دوی ټول قانوني اسناد له ځانه سره لري.

د پاچا خان ځدراڼ کشر ورور وزير خان د سې شنبې په ورځ (د ليندۍ په ۱۴ مه) افغانستان انټرنشنل – پښتو ته وويل، چې طالبانو څلور ورځې مخکې په خپلسري ډول پر کور شپنې عملیات کړې او وروسته یې د هغه د دوی کلا او جوړ کور ور نړولی دی.

ښاغلی وزیر وایي، چې طالبانو د کلا د نړولو پر مهال له دوی څخه د اسنادو غوښتنه نه ده کړې او په خپل سر یې د دوی کلا نړولې ده.

هغه زیاته کړه، د افغانستان په ډېرو سيمو کې طالبانو د اصلي غاصبينو د کورونو، ښارګوټو او اولادونو امنيت نیولی او قانون نه پرې پلی کوي.

که څه هم هغه د کوم مشخص غاصب نوم ياد نه کړ؛ خو د کابل د شېر پور سیمه یې یاده کړه چې ډېره ساحه یې غصب شوې ده.

هغه وویل، چې طالبانو د دوی کورنۍ پسې د غضب په نوم ګنګوسې خپرې کړي دي.

هغه زیاته کړه: «موږ قانوني اسناد لرو، له دې سره بیا هم طالبان په موږ پسې غلطې ګنګوسې خپروي، دا څنګه سوله او عدالت دی».

وزير خان ځدراڼ وایي، چې له دې پېښې شاوخوا څلور ورځې تېريږي؛ خو په خوست او کابل کې طالب چارواکي د کلا د نړولو دلیل نه په ډاګه کوي او د دوی پوښتنو ته ځواب نه وایي.

نوموړي له طالبانو غوښتي، چې د دې خپلسرې کړنې په اړه دې دوی ته ځواب ووایي.

نړول شوې کلا پاچا خان ځدراڼ ته د پخواني ولسمشر حامد کرزي د فرمان پر اساس ورکړل شوې وه.

نور خبرونه

رادیو

ستاسو د غږ لپاره کور

خپل فلمونه او غږونه را ولېږئ