د طالبانو دفاع وزارت د یوې خبرپاڼې په خپرولو سره بدخشان ته د دغې ډلې د لوی درستیز فصیح الدین فطرت د سفر خبر ورکړ.
هغه په بدخشان کې د طالبانو له ځواکونو سره د کتنې پر مهال وویل، چې د سیمه ییزو رسنیو هغه راپورونه چې د ده ټاټوبي ته د هغه د سفر مخنیوي په اړه خپاره شوي اوازې دي.
تر دې مخکې ځینو سیمه ییزو رسنیو راپور ورکړی و، چې د طالبانو مشر هبت الله پر فصیح الدین فطرت د خپل ټاټوبي بدخشان په ګډون د افغانستان یو شمېر شمالي ولایتونو ته پر تګ بندیز لګولی دی.
دغو راپورونو بدخشان ته د ښاغلي فطرت د سفر د بندیز لامل د طالبانو تر منځ قومي اختلافاتو او د دغې ډلې د مشرتابه د څو تاجک قوماندانانو په اړه بې باوري بللې ده.
له دې سره، د طالبانو دفاع وزارت د جمعې په ورځ «د لیندۍ ۱۷مه» په یوه خبرپاڼه کې لیکلي چې فصیح الدین فطرت په بدخشان ولایت کې د «د عمر ثالث د ۲۱۹مې سرحدي فرقې» له اتم سرحدي کنډک څخه لیدنه وکړه.
ښاغلي فطرت په بدخشان کې له طالب ځواکونو وغوښتل چې "ښه روحیه" ولري.
د یادولو ده چې، په تېرو ورځو کې نوموړی د تخار، کندز، پنجشیر او بغلان په ګډون یو شمېر نورو ولایتونو ته هم سفر کړی و.
د طالبانو لوی درستیز دغه سفرونه په داسې حال کې کوي چې د هېواد په بېلابېلو ولایتونو په ځانګړي ډول پلازمېنه کې د طالبانو پر ضد د بریدونو په شمېر کې زیاتوالی راغلی دی.