په ملګرو ملتونو کې د پاکستان استازي منیر اکرم تېره ورځ ناوخته د ملګرو ملتونو د امنیت شورا په غونډه کې چې د افغانستان د وضعیت په اړه رابلل شوې وه، ویلي چې پاکستان دا مهال له ټي ټي پي سره د نورو ډلو له یو ځای کېدو وروسته له لوړ امنیتي ګواښ سره مخ دی.
هغه تېره ورځ چهارشنبه (د لیندۍ ۲۹مه) د ملګرو ملتونو امنیت شورا په غوڼده کې د خپلو خبرو په ترڅ کې زیاته کړه چې په پاکستان کې د حکومت ضد وسلوالې ډلې تحریک طالبان پاکستان ته بهرنۍ پرمختللې وسلې لاس ته ورغلې او د دغه هیواد د امنیتي ځواکونو په وړاندې په جګړه کې ترې کار اخلي.
په ملګرو ملتونو کې د پاکستان استازي په څرګنده و نه ويل چې ټي ټي پي ته دغه وسلې څومره او څنګه لاسته ورغلې خو ښايي هدف یې په کابل کې د طالبانو اداره وي چې تل پرې پاکستاني چارواکو د ټي ټي پي د ملاتړ تورونه پورې کړي.
منیر اکرم اندېښنه ښودلې او زیاته کړې یې ده چې ملګري ملتونه دې په دې اړه پلټنه وکړي چې دغه وسلې د پاکستان ضد ټي ټي پي وسلوالې ډلې ته څنګه لاس ته ورغلې دي.
ملګرو ملتونو لا په دې اړه خپل رسمي نظر نه دی څرګند کړی.
واک ته د طالبانو تر رسېدو وروسته د پاکستان حکومت په ځلونو په کابل کې طالبان تورن کړي چې د پاکستاني طالبانو ملاتړ کوي او هغوی ته یې د ۲۰۲۱ کال له اګسټ میاشتې وروسته له ناټو او امریکايي ځواکونو څخه پاتې شوې پرمختللې وسلې ورکړې دي.
د طالبانو ویاند ذبیح الله مجاهد بیا د پاکستان حکومت دا ډول دعوې بې بنسټه بللې او ویلي یې دي چې د پاکستان د حکومت په وړاندې د ټي ټي پي جګړه د دغه هیواد کورنۍ موضوع ده او په دوی پورې اړه نه لري.
تر دې وړاندې هم د پاکستان سیاسي او امنیتي چارواکو په نړېوالو دریځونو ادعا کړې چې په کابل کې طالبان د پاکستاني طالبانو د تحریک یا ټي ټي پي ملاتړ کوي او هغوی ته یې له ناټو او امریکايي ځواکونو څخه پاتې شوې وسلې ورکړې دي خو تر اوسه پورې دغه ادعا په نړېواله کچه د خپلواکو سازمانونو له لوري نه ده څېړل شوې.
پاکستان دا مهال د ټي ټي پي په مشرۍ د نږدې څلوېښتو لویو او وړو وسلوالو ډلو له جګړې سره مخ دی او په ۲۰۲۳ میلادي کال کې د دغه هیواد په امنیتي ځواکونو سلګونه لوی او واړه بریدونه شوي چې په کې د یاد هیواد امنیتي ځواکونو ته درنه مرګژوبله اوښتې ده.
