د ټانک ولسوالۍ پولیسو افغانستان انټرنشنل ته ویلي، چې برید د منګلېن په سیمه کې د یو سرکاري مامور پر کور شوی چې په ترڅ کې یې دوه کسه وژل شوي او د یوې مېرمنې په ګډون دوه تنه نور ټپیان شوي دي.
په سیمه کې د افغانستان انټرنشنل خبریال رفعت الله ورکزی وايي، د دغه کور خاوند سرکاري ټیکه دار و چې ښايي یو شمېر وسلهوالو ډلو له نوموړي پیسې غوښتې وې او د هغه د انکار له امله وسلهوالو طالبانو د هغه پر کور برید کړی وي.
منګلېن د ټانک ولسوالۍ لرې پرته غره ایزه سیمه ده، چې هلته بېلابېلې وسلهوالې ډلې مېشتې دي؛ خو د ټانک ولسوالی له تېرو څو میاشتو راهیسې د سختو شخو شولانګو شاهده پاتې شوې او ډېر ځله د پاکستان تحریک طالبان او ځینې نورې وسلهوالې ډلې دغلته پر امنیتي پوستو او مرکزونو بریدونه کوي، چې حکومتي غاړې ته مرګ ژوبله هم اړوي.
