د ترکیې د دفاع وزارت د شنبې په ورځ اعلان وکړ ، چې د عراق په شمال کې د کوردستان کارګر ګوند یا پي کې کې له وسله والو سره په جګړه کې په تېرو دوو ورځو کې د دغه هېواد ۱۲ پوځیان وژل شوي دي. د دغه وزارت په وینا په دې جګړې کې لږ تر لږه ۱۳ کورد وسله وال هم وژل شوي دي.
د ترکیې د دفاع وزارت په اېکس کې د یوې بیانیې په نشرولو لیکلي دي، چې په تېرو دوو ورځو کې د عراق په شمال کې د ترکیې پر پوځي اډې د نفوذي برید په پایله کې ۱۲ تنه ترکي سرتېري وژل شوي او یو تن سرتېری ټپي شوی دی.
د کوردستان د کارګرانو ګوند چې د ترکیې، متحده ایالاتو او اروپایي اتحادیې لخوا د یوې ترهګرې ډلې په توګه پیژندل شوی، په ۱۹۸۴ کې د ترکیې د حکومت پر ضد وسله پورته کړه.
ترکیه په منظم ډول په عراق کې د وسله والو پر وړاندې د خپلو عملیاتو د یوې برخې په توګه هوايي بریدونه کوي.
