د پاکستان د کورنیو چارو وزارت د دوشنبې په ورځ وویل، ۲۹۰ بلوڅ لاریونوال چې تېره اوونۍ د پاکستان په سوېل لوېدیځ کې د بشري حقونو د سرغړونو پر ضد د اعتراض په توګه یې لاریون تر اسلام اباده ورسولو، له خبرو اترو وروسته خوشې کړي دي.
خو له بلې خوا بیا د بلوڅانو د حقونو فعالې ماهرنګ بلوڅ په یوې خپرې شوې ویډیو کې د خوشې شویو کسانو شمېر ۱۶۰ تنه یاد کړې دي.
دغه لاریون وروسته له هغه پیل شو، چې د دوی په وینا د سي ټي ډي لهخوا یو ځوان بلوڅ په زندان کې ووژل شو.
سي ټي ډي وايي، وژل شوي کس له وسلهوالو سره اړيکې لرلې او په سيمه کې يې په يو شمېر بريدونو کې لاس درلود؛ خو د هغه کورنۍ او د مدني ټولنې فعالان د سي ټي ډي دغه ادعا ردوي او دا د "بې عدالتي وژنې" پېښه بولي.
اعتراض کوونکي چې د اسلام اباد پرېس کلب مخې ته راټول شوي وو، په بلوچستان کې یې د سيټيډي د منحلولو، د ټولو "لادرکه شویو کسانو" خوشې کولو او همدارنګه د هغو ملګرو د خوشې کولو غوښتنه کوي، چې تېره اونۍ د پولیسو سره له نښتو وروسته نیول شوي وو.
د پاکستان د کورنیو چارو وزارت پر اېکس پاڼه لیکلي:« د لومړي وزیر لهخوا جوړه شوې کمیټې سره د خبرو اترو او د اسلام اباد سترې محکمې پرېکړې په رڼا کې، ټول اعتراض کوونکي خوشې شوي دي.»
هغه وويل:« په ټوليزه توګه ٢٩٠ کسان له زندانونو خوشې شوي دي.»
هغه زياته کړه، هر څوک حق لري چې په سولهييز ډول لاريون وکړي؛ خو هېچا ته به اجازه ورنکړل شي چې قانون په خپل لاس کې واخلي.
د شنبې په ورځ د بلوڅانو یوې كمېټې حكومت ته درې ورځې وخت وركړ، چې د زدهکړیالانو او فعالانو پر ضد دې ټولې قضيې لغوه كړي او ټول بلوڅ لاريون كوونكي دې خوشې كړي.
