یوې مخکښې بلوڅ فعالې د سه شنبې په ورځ له حکومته وغوښتل، د ملګرو ملتونو د حقیقت موندنې ډلې ته دې اجازه ورکړي چې په بلوچستان کې دې د بشري حقونو سرغړونې وپلټي. هغې ژمنه وکړه، چې د غوښتنې تر پوره کېدو پورې به په پلازمینه کې اعتراضونو ته دوام ورکړي.
د ښځو او ماشومانو په ګډون تر ۲۰۰ ډېرو بلوڅ لاریونوالو په اسلام اباد کې د هغه څه پر ضد لاریون کړی، چې دوی یې په خپله صوبه کې د بلوڅانو د «جبري ورکېدل» او «نسل وژنه» بولي.
دوی له پرېس کلب څخه بهر له ۱۶۰۰ کیلومټره مزل وروسته د هغه څه په غبرګون کې خیمې ودرولې، چې د تربت یو ۲۴ کلن ځوان بالاچ بلوڅ د پولیسو په توقیف کې ووژل شو.
د ترهګرۍ سره د مبارزې ریاست هغه په یو شمېر بریدونو کې په ښکېلتیا تورن کړی و؛ خو د بلوڅ کورنۍ او د مدني ټولنې فعالان د سيټيډي ادعا ردوي او د هغه وژنه د بې عدالتۍ وژنه بولي.
ماه رنګ بلوڅ چې اسلام اباد ته یې د لاریون مشري کوله رسنیو ته یې په خبرو کې وویل، دوی د دې مسلې د څېړلو لپاره د حکومت لهخوا جوړه شوې کمیټه رد کړې او په بلوچستان کې د بشري حقونو د سرغړونو دایمي پای ته رسول غواړي.
هغې زیاته کړې:« دا زموږ غوښتنه ده، چې د ملګرو ملتونو د حقیقت موندنې کمیټه بلوچستان ته راولیږي چې په صوبه کې د بشري حقونو سرغړونو ته پام وکړي.»
اغلې بلوڅ وويل، حکومت پخوا هم کميټې جوړې کړې وې؛ خو کومې پايلې يې نه لرلې.
هغې وویل، بلوڅ لاریونوال د څو کسانو لپاره د عدالت غوښتنې لپاره اسلام اباد ته نه دي تللي او په صوبه کې د جبري لادرکه کولو عمل نوی نه دی او باید ختم شي.
حکومت او دولتي ادارو په وار، وار دغه ډول ادعاوې رد کړې دي.
بلوڅ فعالانو همداراز د هغو یو شمېر لاریونوالو د خوشې کېدو غوښتنه هم وکړه، چې په دې وروستیو کې په اسلام اباد کې د پولیسو لهخوا نیول شوي دي.
