د ملګرو ملتونو د امنیت شورا غړو د پنجشنبې په ورځ د یوې خبرپاڼې په خپرولو سره، د ایران په کرمان ښار کې دغه « ترهګریز بزدلانه برید» غندلی. دغې شورا ټینګار کړی، چې «ترهګري په هره بڼه د نړۍوال امنیت او سولې لپاره یو له جدي ګواښونو څخه ده.»
د امنیت شورا غړو د دغو ترهګریزو کړنو د عاملینو، تنظیموونکو، تمویلوونکو او ملاتړ کوونکو د حساب ورکونې او محاکمې پر اړتیا ټینګار وکړ.
هغوی له ټولو هېوادونو غوښتي، چې د نړۍوالو قوانینو او د امنیت شورا د پرېکړه لیکونو د ژمنو پر بنسټ د ایران دولت او اړونده چارواکو سره یې په دې برخه کې رغنده همکاري وکړي.
د چهارشنبې په ورځ د مرغومي په ۱۳مه په کرمان ښار کې د قاسم سلیماني د څلورم تلین پرمهال دوه چاودنې وشوې.
د ایران د صدا او سیما رسنۍ اعلان وکړ، چې د یوه بل ټپي د مړینې سره د دغو بریدونو د وژل شویو کسانو شمېر ۸۵ تنو ته لوړ شو.
د دغه برید پړه داعش ډلې منلې ده.
