د پاکستان بهرنیو چارو وزارت په یوه خپره شوې خبرپاڼه کې د ایران له لوري د دغه هیواد پر هوایي حریم او خاوره تیری غندلی او ګوتڅنډنه یې کړې چې دغه برید به بدې پایلې ولري. ویل کېږي، چې دغه بریدونه تېره ورځ ناوخته د پاکستان د بلوچستان ایالت په پنجګور سیمه شوي دي.
تېره ورځ سې شنبه (د مرغومي ۲۶مه) تسنیم خبري اژانس چې د ایران د اسلامي انقلابي ګارډ قول اردو اړوند اژانس دی، د پاکستان پر خاوره د ایران د بې پیلوټه الوتکو او توغندیو د برید خبر ورکړی او لیکلي یې دي چې په دغه برید کې د جیش الظلم (جیش العدل) دوه مرکزونه ویجاړ شوي دي.
د پاکستان بهرنیو چارو وزارت نن چهارشنبه (د مرغومي ۲۷مه) په خپله خبرپاڼه کې لیکلي چې په دغه بریدونو کې چې د دغه هيواد د بلوچستان صوبې په پنجګور سیمه شوي دوه ماشومان وژل شوي او درې ماشومانې ټبیانې دي.
په خبرپاڼه کې وړاندې لیکل شوي چې د پاکستان پر حاکمیت شوی برید په هیڅ ډول د منلو وړ نه دی او ایران یې باید ځواب ته په تمه شي.
خبرپاڼه کاږي، سره له دې چې د ایران او پاکستان تر منځ د اړیکو چینلونه هم موجود دي خو وايي بیا هم ایران د برید لاره خپله کړې او په دې اړه یې خبرې نه دي کړې.
د پاکستان بهرنیو چارو وزارت وايي د دغو بریدونو په اړه یې په اسلام اباد د ایران شارژدافیر ورغوښتی او هغه ته یې د ایران له لوري پر پاکستان د شويو بریدونو په اړه د خپل حکومت دریځ روښانه کړی او هغه ته یې د دغو بریدونو د بدو پایلو په اړه خبرداری ورکړی.
خبرپاڼه زیاتوي چې پاکستان تل ویلي چې «ترهګري د سیمې د ټولو هېوادونو لپاره ګډ ګواښ دی چې په اړه یې همغږي ګام ته اړتیا ده. دا ډول یو اړخیزې کړنې د ښه ګاونډیتوب له اړیکو سره سمه چاره نه ده او کولای شي دوه اړخیز باور او اعتماد ته جدي زیان ورسوي.»
له دې مخکې د ایران په سیستان او بلوچستان صوبې کې یوې فعالې خبری رسنۍ حالوش د سې شنبې په ورځ خبر ورکړی و، چې سپاه پاسداران د ایران او پاکستان ترمنځ په سرحدی سیمه کې په یوه کلي د توغندیو برید کړی دی.
جیش العدل د ایران د اسلامي جمهوریت پر ضد وسله واله اسلامپاله ډله ده، چې ځان د سنیانو د حقونو مدافع ګڼي.
په ورته وخت کې د ایران یو پلاوی د دواړو هېوادونو په ګډو سمندري تمریناتو کې د ګډون لپاره پاکستان ته تللی دی.
