د فلسطین د روغتیا وزارت د پنجشنبې په ورځ ( د سلواغې ۵مه) اعلان وکړ، چې په تېرو ۲۴ ساعتونو کې شاوخوا ۵۰ فلسطینیان په خان یونس کې وژل شوي دي. د دغه وزارت د اعلان سره سم، پر غزې د اسراییل د برید له پیله تر دې مهاله ۲۵ زره او ۹۰۰ فلسطینیان وژل شوي دي.
د غزې د تړانګې د ۲.۳ مېلیونه وګړو ډېره برخه بېځایه شوې او دا مهال د اسراييلي بریدونو له امله د خان یونس او شمالي او سویلي ښارونو کې تر سختو فشارونو لاندې ژوند کوي.
اسراییلي پوځ ویلي، چې ځواکونه یې په خان یونس کې د حماس له وسلهوالو سره په جګړه کې ښکېل دي او دغو ځواکونو د حماس پټنځایونه په نښه کړي دي.
اسراییل وايي، چې د حماس جنګیالي له روغتونو څخه د خپلو سنګرونو په توګه کار اخلي، هغه څه چې د حماس او روغتیايي کارکوونکو لهخوا په کلکه رد شوي دي.
د ملګرو ملتونو د چارواکو په وینا، د پنجشنبې په ورځ هغه لسګونه زره بېځایه شوي کسان چې خان یونس ته یې پناه وړې وه، رفح ته د تېښتې په حال کې دي.
د سره صلیب نړۍواله کمېټه وايي، ۱.۵ مېلیونه بېځایه شویو کسانو په سویل کې پناه اخیستې، هلته چې لا هم د جګړې د زیاتوالي له امله له ګواښونو سره مخامخ شوي دي.
