د پاکستان د ټاکنو کمېسیون اعلان کړی، چې د قامي او صوبايي جرګې د نوماند ریحان زېب د وژل کېدو له امله د خیبر پښتونخوا د باجوړ د اتمې او ۲۲مې حلقې ټاکنې وځنډېدې.
ریحان زېب نن د پښتونخوا باجوړ ته د خپل ټاکنیز کمپاین لپاره روان و، چې وسلوالو پرې صدیق اباد پاټک کې پرې برید وکړ.
تر اوسه کومې ډلې پر نوموړي د برید مسوولیت نه دی منلی.
ځايي رسنۍ د پولیسو په حواله وايي، په برید کې ریحان او درې ملګري یې ټپیان شوي وو؛ خو ریحان وروسته روغتون کې مړ شو.
د پاکستان د ټاکنو کمېسیون په اعلامیه کې پر حکومت غږ کړی، چې د ریحان زېب د وژنې قضیه دې وڅېړي او په اړه دې د ټاکنو کمېسیون ته معلومات ورکړي.
ریحان زېب پخوا د پاکستان تحریک انصاف ګوند غړی و؛ خو د ګوندي ټاکنیز کارت د نه تر لاسه کولو له امله له اتمې ټاکنیزې حوزې څخه قومي اسمبلۍ (جرګه) او له ۲۲مې څخه صوبایي اسمبلۍ ته خپلواک نوماند و.
د پاکستان ټولټاکنې اته ورځې وروسته دي چې پکې د دغه هېواد پارلمان یا قامي اسمبلۍ او صوبايي پارلمان ته غړي ټاکل کېږي.