یوه ورځ وروسته له هغې چې عمران خان او شاه محمود قریشي د دولتي رازونو د افشا په برخه کې د محکمې لهخوا په لس، لس کاله بند محکوم شول، نن په یوې بلې محکمه کې عمران خان او د هغه مېرمن بشرا بيبي د توشه خانې په قضیه کې په ۱۴ کاله بند محکوم شول.
بشرا بيبي د پاکستاني پولیسو لهخوا نیول شوې او د راولپنډۍ یوه زندان ته لېږدول شوې ده.
د پاکستان د احتساب محکمې د توشه خانې په مقدمه کې پخوانی لومړی وزیر عمران خان او د هغه مېرمن بشرا بيبي ته د ۱۴ کاله بند سزا اورولې ده.
د غویي په ۲۰مه عمران خان د اسلام اباد په یوې محکمه کې د امنیتي ځواکونو لهخوا نیول شوی و، چې لومړی اټک زندان کې و او له هغه وروسته اډیاله زندان ته ولېږدول شو.
تحريک انصاف ډلې د محکمې دغه پرېکړه يوه ټوکه او سياسي انتقام بللی.
د دې ډلې وياند ﺭووف حسن ویلي، چې د پاکستان د محکمو تاﺭيخ د ډېرو بدو پېښو او بدو پرېکړو شاهد پاتې شوی دی.
د دغې پرېکړې له مخې چې د پاکستان د احتساب محکمې کړې، بشرا بيبي او عمران خان ته د توشه خانې په مقدمه کې د ۱۴ کلونو بند سربېره ۱.۵ مېلیارده جرمانې د ټاکلو تر څنګ هغوی دواړه د ۱۰ کلونو لپاره نه شي کولای په دولتي څوکیو کار وکړي.
