د امریکا د سمندري ځواکونو پخواني افسر د کانګرس د بهرنیو اړیکو کمېټې ته ویلي، چې طالبان د پخوانیو پوځیانو او د هغوی د کورنیو په لټه کې دي.
هغه د دغو پوځیانو اقتصادي وضعیت ته په کتو وایي، که طالبان هغوی و نه وژني او بندیان یې هم نه کړي؛ خو لوږه او وزګارتیا هغوی ګواښي او وژني یې.
کپیټان مایکل سېزمار د امریکا د استازو جرګې د بهرنیو اړیکو د شاهدۍ ورکولو کمېټې ته وویل، چې په ډېر شمېر کې پخواني پوځیان او د هغوی د کورنیو غړي د طالبانو لهخوا وژل شوي او دغه لړۍ لا روانه ده.
هغه د هغې افسرې مېرمنې یادونه وکړه، چې د مېړه په مخکې یې اعدام شوه، له یو دوولس کلن ماشوم سر په بنجشېر کې پرې شو، د پخواني امنیت دوه غړي په دار وځړول شول، سره له دې چې طالبانو دوی ته د عفوې په نامه سندونه هم ورکړي وو.
د امریکا د سمندري ځواکونو دغه پخواني افسر وویل، چې پخوانیو افغان افسرانو د امریکايي ځواکونو سره څنګ په څنګ په رښتیني ډول خدمت کړی؛ خو نن په سپین میدان پاتې دي.
هغه وویل، د هغو افغان پوځیانو په اړه یې معلومات راغونډ کړي چې یا وژل شوي او یا هم ځورول شوي دي.
یو شمېر نورو پخوانیو امریکایي پوځیانو هم په دغې غونډه کې د پخوانیو افغان پوځیانو د نیولو او د هغو ګواښونو په اړه شمېرې وړاندې کړې، چې نن سبا هغوی او د هغو کورنۍ ورسره مخامخې دي.
یو بل پخواني امریکايي پوځی د پخواني حکومت د هغو څارنوالانو وضعیت ډېر بد وباله، چې له امریکایي او نورو نړۍوالو ځواکونو سره یې کار کاوه او اوس په خپلو کورونو کې د بندیانو په شان ژوند کوي.
هغه له کانګرس او بهرنیو چارو له وزارته وغوښتل، چې د دغو کسانو لپاره دې د ویزو په ورکولو کې اسانتیاوې ډېرې او دغه بهیر دې ګړندی کړي.
نوموړي د امریکا د کانګرس د بهرنیو اړیکو په کمیټه کې د شهادت ورکولو پر مهال وویل، چې د افغانانو سره دغه کړه وړه کېدای شي په راتلونکې کې له امریکا سره د خلکو پر کړو وړو بدې اغېزې پرې باسي.
امي مارټین په دغې غونډه کې یو بل شاهد و چې ځان یې د سپټمبر د یوولسمې پېښې د نسل استازی باله، هغه د جلسې غړو ته وویل هغه پرېکړه چې دوی په افغانستان کې د خپلو پاتې شویو پخوانیو همکارانو په اړه کوي په راتلونکو نسلونو به هم خپلې بدې اغېزې پرې باسي.