د طالبانو د کانونو وزارت وايي، د بدخشان د ارغستان د سرو زرو کان یې له داوطلبۍ وروسته د باختر فولاد شرکت ته سپارلی. د دغه وزارت په خبرپاڼه کې راغلي، دغه تړون له هغې پروسې وروسته نوموړي شرکت ته ورکړل شو، چې د داوطلبۍ لپاره یې څلورو شرکتونو خپل غوښتنلیکونه دغه وزارت ته سپارلي وو.
په خبرپاڼه کې دا رنګه راغلي، چې د دغه کان د پروسس او چاڼولو ټولې چارې به دننه په افغانستان کې ترسره کېږي او د کان کېندنې او استخراج ټول لګښت به د ګټونکي شرکت پر غاړه وي.
له هغه مهاله چې طالبان بیا پر افغانستان واکمن شوي؛ نو د خپلو لګښتونو د پوره کولو له پاره یې د افغانستان طبیعي زېرمو ته زیاته پاملرنه کړې او په خلاص مټ دغه کانونه استخراجېږي او دغه ګران بیه توکي نورو هېوادونو ته استول کېږي.
ګڼ کتونکي وايي، چې دغه کانونه د افغانستان ملي پانګه ده او په کار نه دي چې د لنډ مهاله ګټې له پاره دې په نامسلکي او غیر معیاري توګه دغه کانونه راوسپړل شي.
د دوی په باور تر هغې چې طالبانو کورنی مشروعیت نه وي تر لاسه کړی، دا حق نه لري چې د افغانستان ملي پانګې په نورو بازارونو کې لیلام ته وړاندې کړي.
د افغانستان پخواني ولسمشر اشرف غني هم ویلي، چې د طالبانو لهخوا د کانونو قراردادونه په پټه ورکول کېږي او نړۍوال مشروعیت نه لري.
