د بښنې نړۍوال سازمان د طالبانو د استخباراتو مشر عبدالحق وثیق ته په یوه پرانیستي لیک کې د زدهکړو د دوو فعالینو احمد فهیم عظیمي او صدیق الله افغان د ژر تر ژره خوشې کېدو غوښتنه کړې ده.
په دغه لیک کې راغلي، چې د ۲۰۲۳ کال د اکټوبر په ۱۷مه دغه دوه فعالان چې د فکر بهتر د پوهنې له موسسې سره کار کوي، د طالبانو د استخباراتو لهخوا د کابل په کارته چهار سیمه کې په خپل دفتر کې ونیول شول.
په دغه لیک کې راغلي، چې له ۷۲ ورځو تر پوښتنو ګروېږنو وروسته د ۲۰۲۳ کال د ډسمبر په ۲۷مه دوی محاکمه شول او وروسته د څرخي پله زندان ته واستول شول.
دغه سازمان وایي، د احمد فهیم عظیمي او صدیق الله افغان خپل سرې نیونه د بشري حقونو د نړۍوالو قوانینو خلاف کړنه ده، دوی باید سمدستي او بې له کوم قیدو شرطه خوشې شي.
د دغه سازمان په وینا، طالبانو دغه دوه فعالین له افغانستانه د افغان روباټیک نجونو سره په همکارۍ، د معترضو مېرمنو په ملاتړ او د طالبانو پر ضد د مېرمنو د لاریونونو پر جوړونې تورن کړي دي.
دغه سازمان وایي، چې دغو دواړو فعالینو او د دوی کورنیو دغه تورونه رد کړي دي.
دغه سازمان د دغو دواړو فعالینو د خوشې کېدو ترڅنګ له طالبانو غوښتي، چې پرته له قید و شرطه دې نجونو ته هم د زده کړو اجازه ورکړي.
دغه سازمان زیاته کړې، چې طالبان باید د بشري حقونو د فعالینو خپل سرې نیونه او د دوی ربړونه نوره ودروي.
