روسیې د یکشنبې په ورځ ویلي، چې اوکراین د نهو ښځو او یو ماشوم په ګډون لږ تر لږه ۲۸ کسان هغه مهال وژلي، چې ځواکونو یې د روسیې تر کنټرول لاندې ختیځ اوکراین کې پر یوه نانوايي او رسټورانټ د لویدیځ له خوا د ورکړل شویو راکټونو پر مټ برید کړی.
روسي چارواکو ویلي، چې اوکراین د شنبې په ورځ د لیسیچانسک پر ښار د متحده ایالاتو له خوا د ورکړل شویو راکټونو پر مټ برید کړی.
د بېړنيو پېښو کارګرانو د شپې په اوږدو کې د مسکوسکا په کوڅه کې د ویجاړ شوي رستورانت په خاورو خځلو کې د ژوندي پاتې شویو کسانو لټه کوله، چېرې چې د ملکي کسانو لپاره یوه نانوايي هم جوړه شوې وه.
د لوهانسک په سیمه کې چې اوس د روسي ځواکونو تر کنټرول لاندې ده، د روسیې له خوا ټاکل شوي چارواکي لیونید پاسیچنک ویلی: “د اوکراین وسله والو په لیسیچانسک کې پر یوه نانوايي برید کړي.”
ښاغلي پاسیچنک ویلي، چې د برید پر مهال په نانوايي کې د ولسي خلکو ګڼه ګوڼه وه. د روسیې د بېړنیو حالاتو وزارت ویلي، لس تنه یې د نانوايي له ویجاړیو راویستي دي.
دغه وزارت ویلي، چې د ژغورل شویو څلورو کسانو روغتیايي حالت نازک دی او دوی لا هم د نورو کسانو د ژغورلو هڅه کوي.
اوکراین تر اوسه د دې برید په اړه څه نه دي ویلي.