افغان ملي لوبډله د سریلانکا له لوبډلې اوس د ۲۴۱ منډو پوروړې ده، لومړی به افغان لوبډله یادې منډې پوره کوي او وروسته به سریلانکا لوبډلې ته هدف ټاکي.
د افغانستان او سریلانکا د کرېکټ لوبدلو ترمنځ یواځنۍ ټیسټ سیالۍ درې ورځې وړاندې پیل شوه، د سیالۍ لومړۍ ورځ د افغان لوبډلې لپاره ښه نه وه او ټوله لوبډله د ۱۹۸ منډو په جوړولو سره وسوځېده.
د افغانستان کرېکټ بورډ وايي، د یک شنبې په ورځ د (سلواغي ۱۵مه) د سریلانکا لوبډلې د افغانستان د ۱۹۸ منډو په ځواب د سیالۍ د دریمې ورځې په پیل کې د ۴۳۹ منډو په جوړېدو ټول لوبغاړي وسوځیدل.
د افغانستان له لوري چټک توپ اچونکي نوید ځدراڼ څلور، قیس احمد او نجات مسعود دوه دوه لوبغاړي وسوځول.
دمګړۍ افغان لوبډله ۲۴۱ منډې له سریلانکا لوبډلې څخه پوروړې ده. افغان لوبډله به د نن ورځې تر پایه لومړی د سریلانکا لوبډلې د ۲۴۱ منډو قرض پوره کوي او له هغې وروسته اضافه منډې به د سریلانکا لپاره هدف ټاکل کیږي.
له دغې ټیسټ سیالۍ وروسته به د سریلانکا په کوربه توب افغان لوبډله له سریلانکا سره درې نړیوالې یو ورځنۍ او درې شل اوریزې سیالۍ هم ترسره کوي.