دغو پرلتوالو دوه ورځې وړاندې خبرداری ورکړی و، که د پاکستان حکومت له لوري د سپین بولدک چمن پر دروازه د پاسپورټ جبري کېدو پرېکړه وانه خیستل شي، دوی به د پوځي کلا مخې ته پرلت ووهي او د فبرورۍ په اتمه نېټه ټاکنو کې به برخه نه اخلي.
د سویلي پښتونخوا چمن پرلتوالو تېره شپه ناوخته په چمن ښار کې د پاکستان پوځ پوځي کلا مخې ته کانټينرونه کېښودل او پوځي کلا ته د تګ راتګ لاره یې بنده کړه.
دغو پرلتوالو دغه کار د پاکستان د حکومت له لوري د دوی د غوښتنو د نه منلو په غبرګون کې وکړ.
د چمن د لغړي اتحاد مشر او د پرلت سر لاری غوث الله اڅکزی وايي:« موږ د نږدې څلورو میاشتو راهیسې په سوله او امن کې دلته ناست یو؛ خو زموږ غوښتنې نه منل کېږي، موږ د خپل حق غوښتنه کوو، دا زموږ څلورم ګام دی ، موږ پرلت وواهه، لاریونونه مو وکړل او د نه خوړو اعتصاب مو وکړ؛ خو بیا هم زموږ غږ وا نه ورېدل شو. اوس مو دا پرېکړه وکړه چې نور باید د پوځي کلا مخه بنده کړو.»
د پاکستان د حکومت له لوري د سپین بولدک ـ چمن پر دروازه افغانستان او پاکستان ته پر تلونکو کسانو د پاسپورټ او ویزې د جبري کېدو د پریکړې په غبرګون په پاکستان کې دا تر ټولو اوږدمهاله پرلت دی، چې د پاکستان د حکومت له لوري یې تردې مهاله غوښتنې نه دي منل شي.
د دغه پرلت غړی فیض محمد وايي:«موږ چې د خپلو خلکو سره کومه ژمنه کړې ده هغه به حتمن پوره کوو، د چمن د ولس لپاره مو پرلت پیل کړی او نن پوځي کلا مخې ته د لارې بندولو ژمنه پوره کوو. موږ ته داسې خبرونه هم رسېدلي، چې ممکن د سپین بولدک ـ چمن دروازه به د پخوا په شان د افغانستان په تذکره او د پاکستان په شناختي کارت خلاصه شي؛ خو د چمن ځیني سیاستوال او سوداګر ځانته د امتیاز ورکولو په خاطر د دروازې د خلاصېدو مسله ورځ تر بلې ځنډوي.»
د نږدې څلورو میاشتو راهیسې د سپین بولدک ـ چمن پر دروازه سوداګري او پر پاسپورټ د عامو خلکو تګ راتګ ټکنی شوی دی.
ځايي سوداګر او عام وګړي وايي، د پاکستان حکومت له لوري د پاسپورټ د جبري کېدو له پرېکړې سره د یادې سیمې خلکو ته په میلیونونو ډالرو زیانونه اوښتي دي.