د افغانو ښځو په چارو کې د امریکا ځانګړې استازې رینا امیري وویل، چې ملګرو ملتونو د افغانو ښځو او د نجونو د زده کړو د ملاتړ په موخه یوه غونډه جوړه کړې ده. دا غونډه په ملګرو ملتونو کې د بلجیم د استازولۍ په غوښتنه د افغان ښځینه فعالانو په حضور کې جوړه شوې وه.
په افغانستان کې د ښځو او بشري حقونو لپاره د امریکا ځانګړې استازې په خپل اېکس کې د یوه انځور په خپرولو سره د دغې غونډې د جوړېدو خبر ورکړی.
په خپور شوي انځور کې لیدل کیږي، چې په دې ناسته کې رینا امیري، په ملګرو ملتونو کې د بلجیم استازی فیلیپ کریدلکا، د افغانستان د روباټیک ټیم بنسټ اېښودونکې رویا محبوب او د ښځو د حقونو فعالې اصیلا وردګ برخه اخیستې ده.
د افغانو ښځو په چارو کې د امریکا ځانګړې استازې دغه راز لیکلي، چې دا غونډه د افغانو ښځو او د ملګرو ملتونو د لسو غړو هېوادونو د استازو په حضور کې ترسره شوه.
رینا امیري لیکلي: "دا چې د طالبانو ظالمانه اقدامات دوام لري؛ نو اړینه ده چې د افغانستان له ښځو او نجونو څخه په ګډه ملاتړ وشي."
په ملګرو ملتونو کې د بلجیم دایمي استازولۍ هم په خپل اېکس کې لیکلي، چې دا ناسته د افغانستان د نجونو او ښځو د زده کړو په اړه ترسره شوه.
یادې استازولۍ همداراز لیکلي، چې په دې ناسته کې د وضعیت د ښه والي لپاره پر ډېپلوماټيکو لارو چارو او کوټلو نوښتونو خبرې وشوې.
طالبانو په تېرو څه باندې دوو کلونو کې په بیلابیلو برخو کې د افغانو ښځو پر ژوند پراخ محدودیتونه وضع کړي دي.
دغې ډلې د نړۍوالو له فشارونو سره - سره خپل محدودیتونه د ښځو د کار او زده کړو په اړه لغوه کړي نه دي.
ښځینه فعالانې تمه لري، چې د دوحې په غونډه کې چې ټاکل شوې تر راتلونکو دوو اونیو جوړه شي، د ښځو وضعیت وڅېړل شي او په افغانستان کې د ښځو او نجونو ستونزو ته رسیدګي وشي.
