پاکستان کې د فبرورۍ د اتمې نېټې ټاکنو ته د دغه هېواد په ټولو صوبو کې تابیاوې نیول شوې دي

AP ۱۴۰۲ سلواغه ۱۸

په پاکستان کې د قومي اسمبلۍ او د څلورو صوبو د ایالتي شوراګانو د استازو د ټاکلو له پاره هلې ځلې روانې دي.
د دغو ټاکنو په درشل کې په پلازمېنه اسلام اباد او د پاکستان په نورو صوبو کې امنیتي ګامونه اخیستل شوي او په هره کوڅه او هره لاره کې د پولیسو ګزمې زیاتې شوې دي.

د شمېرو له مخې پاکستان ټول ټال له ۲۴۱ مېلیونو زیات نفوس لري، چې له هغې ډلې یې د اوسنیو ټاکنو له پاره ۱۲۸ مېلیونه کسان د دې وړ بلل شوي چې په ټاکنو کې برخه واخلي؛ خو د پاکستان د ټاکنو کمېسیون وايي، چې دوی د فبرورۍ میاشتې د ټاکنو له پاره ۲۶۰ مېلیونه رای پاڼې چاپ کړې چې په دې کې د ملي او ایالتي اسمبلو دواړو رای پاڼې شاملې دي.
د فبرورۍ د اتمې نېټې ټاکنو ته ۶ زره او ۳۱ د سياسي ګوندونو غړو او پاتې نورو خپلواکو نوماندانو ځانونه نومولي دي.
د پاکستان قومي اسمبلۍ ته چې په دغه هېواد کې د قانون جوړونې دنده لري ۳۴۲ څوکۍ ځانګړې شوې، چې ۲۷۲ یې عمومي، ۶۰ یې د مېرمنو او ۱۰ نورې یې مذهبي لږکیو ته ځانګړې شوې دي.
د ۲۰۲۴ کال ټاکنو کې د ملي او صوبايي اسمبليو له پاره ټولې ۸۵۹ انتخاباتي حلقې جوړې شوې دي.
پاکستان کې د ۲۰۲۴ کال د ټاکنو د امنیتي خوندیتابه له پاره سلګونه زره ځواکونه ګومارل شوي، چې په دوی کې پولیس، ملیشې او پوځي سرتېري شامل دي.
په پاکستان کې وروستۍ ټاکنې په ۲۰۱۸ کال کې ترسره شوې وې، چې په هغو کې د عمران خان په مشرۍ د تحریک انصاف ګوند تر نورو ډېرې څوکۍ ګټلې وې؛ خو وروسته یې د نورو ګوندونو سره اېتلافي حکومت جوړ کړ.

نور خبرونه

رادیو

ستاسو د غږ لپاره کور

خپل فلمونه او غږونه را ولېږئ