د افغانستان پخوانی ولسمشر حامد کرزي د افغانستان لپاره د اروپايي ټولنې له ځانګړي استازي توماس نېکولسن او د دغې ټولنې له شارژدافیرې رافایلا یودیچه سره په کتنه کې د دوحې د ناستې او د امنیت شورا د پرېکړه لیک په اړه خبرې کړي.
ښاغلي کرزي د چهارشنبې په ورځ (د سلواغې ۱۸مه) پر خپلې اېکس پاڼې لیکلي، چې د دوحې ناسته د افغانستان لپاره مهمه ده او هیله من دی، چې په دغه ناسته کې به د افغانستان د روښانه راتلونکي په لور مثبت ګام واخیستل شي.
دا په داسې حال کې ده، چې ښاغلي نېکولسن د ریاست الوزرا له سیاسي مرستیال سره په کتنه کې وویل، چې د دوحې په ناسته کې به نړۍ له افغانستان سره په پراختیایي او بشري برخو کې د مرستو اعلان وکړي.
ټاکل شوې، چې د دوحې ناسته د ملګرو ملتونو د سرمنشي د ځانګړي همغږي کوونکي له ارزونې وروسته جوړه شي.
سره له دې چې فریدون سینیرلي اوغلو په خپله ارزونه کې سپارښتنه کړې، چې د افغان سولې لپاره دې ځانګړی استازی وګومارل شي؛ خو طالب چارواکي د دې استازي له ګومارلو سره مخالفت ښيي.
د یادولو ده، چې د دوحې ناسته به ۱۱ ورځې وروسته د فېبرورۍ پر ۱۸ او ۱۹ جوړه شي، چې پکې د افغانستان پر ګاونډیانو او نورو هېوادونو سربېره د طالبانو استازي هم ګډون کوي.
